Shillong 11 Naiwieng:
Kalong ka khubor ka ba pynkmen bad pynsngew tynnad ia ki paidbah ka jylla baroh kawei, ki ba la iai kyrshan met bad mynsiem ia u Steve naduh basdang, ha ka ba u samla Steve Jyrwa uba la mih khmat ia ka jylla ha ka Indian Best Dancer Season-4, ula wanrah ia ka nam, ba ula ioh ia ka jingjop ha kane ka jingiakop shad, ba la long hynnin ka sngi u Blei ha Mumbai.
Ka All Meghalaya Dancer Association (AMDA) hapoh ka jingialam ubah Kitbor Thabah mynta ka sngi nyngkong, ka 11 tarik Naiwieng 2024, ka la wan ban ai ka jingkhublei ia baroh ki paidbah nong shong shnong jong ka jylla, ki ba la kyrshan radbah ia u samla Steve Jyrwa naduh ka ba sdang bad haduh ba un da rah syndon ia ka namjop ha ka ne ka Indian Best Dancer Season-4.
Ha ba kren sha kilad pathai khubor ha Shillong press Club mynta ka sngi, ubah Kitbor Thabah ula pynpaw ka jingsngewkmen hadien ba ki la ioh jingtip ba u Steve ula rah ia ka namjop ha ka Indian Best Dancer. Ka jingjop jong u Steve kamdei tang ka burom jong ki bahaiing hasem ne ki kur jyrwa, hynrei kalong ka burom ia ka jylla hi baroh kawei. Ka Association ka phah ruh ka khubor sha ka jylla meghalaya lyngba u Myntri rangbah ka u Conrad K. Sangma, ba unshim ia kane ka bynta, ba kumba mynshwa ki la pynkupburom ia u Amit Paul bad mynta ka jylla ka ioh ia u khundap shynrang u Steve Jyrwa, uba dei u Khasi ba pura, da ka ba ka la kyrpad ba ka sorkar jylla kan pynkupburom kyrpang ia u.
“Namar ka jingtbit bad nangbha ban shad haba ia nujor bad kiwei ki nongshad, nalor ba u Steve ula jop ia la Indian Best Dancer u Steve ula shah jied ban mih khmat sa ia kawei pat ka program shad bad kata kadei ka ” Super Dancer”, la ong u bah Kitbor.
Haba iadei pat bad ka jingthrang jong ki paidbah ban phah wan ia u Steve Jyrwa sha Shillong, na ka liang u bah Kitbor ula pyntip sha ki paidbah ba u Steve un sa wan sha Shillong ynda ula dep ban shad sa ia katei ka Super Dancer ka ba dangshu shah jied shen.
Kumta na ka liang ka Association ka la ainguh nyngkong eh ia u Nongbuh nongthaw ba khlem ma u kiei kiei baroh kim long eiei, ha kajuh kapor ruh, ka la ai khublei ia ki paidbah ka jylla ba ki la kyrshan ia u Steve, ia u myntri rangbah ka jylla u Conrad K. Sangma, ia u bah Hek, bah Paul u CEM ka KHADC bah Pyniaid Sing Syiem, bah Sniawbhalang bad kumjuh ruh ia ki sengbhalang ki ba la iadonbyntalang ban kyrshan ia u Steve.