Shillong:
Kawei ka longkmie ka la ujor sha ki pulit jong ka Palghar ha Maharashtra namar ka la kynnoh ba ka la shah thok ha ka kyrteng shongkha shongman ha uwei u briew uba ka la shongkurim namar u la phet noh ryngkat bad ki jingdon jingem jong ka baroh.
Haba ki pulit ki la kem ia utei u nongshah kynnoh, la mih ka jingpynpaw kaba pynkyndit namar une u nongshah kynnoh u la shongkurim haduh 25 ngut ki kynthei haduh mynta da kaba leh kum kane ka jingleh thok bad kiba bun ki kynthei.
Ki pulit jong ka Nalasopara ha Palghar, Maharashtra ki la kem ia uwei u briew uba la shongkha haduh palat 25 ngut ki kynthei namar haba u la iapoikha u ju neh tang katto katne sngi. Hadien ka jingkhawai, u nongleit kurim ba la shah kynnoh u ju phet krad ryngkat bad ki tiar ba kordor baroh, ki jingdeng bad ka pisa jong ka nongleit kurim jong u.
Ha kane ka por, une u nongleit kurim u la ngat ha ruhnar ne sha phatok haduh 6 sien hynrei ki kam jong u kim shym la sangeh namar u la pynkylla ia ka kyrteng lajong.
Ka kyrteng bashisha jong une u briew ka dei u Firoz Sheikh. Hynrei u la buh ruh bun tylli ki kyrteng kiba pher kum u Anwar, u Rehman, u Rahim, u Suresh ne u Ramesh. U Firoz u la pynlong ia ki 25 ngut ki kynthei kum ki nongshah lehbein jong u haduh mynta. Ka jingthmu jong u ka long tang kawei hadien ba u la dep shongkurim ia ki kynthei, un lute ia ki bad nangta un phet noh. Ki khynnah kynthei ne kynthei kiba u Firoz u pynlong ia ki nongiapoi kha ki kham bun ki kynthei kiba la iap lok ne kiba la iakhlad noh.
Katkum ka jingïathuh jong ki pulit, u nongshah kynnoh u Firoz u la shna ïa ki katto katne ki profile jong u ha ka website kaba ïadei bad ka jingïathoh shongkurim ka Shaadi.com. Lyngba kane, un phah jingkyrpad sha ki kynthei kiba la iap lok, kiba la iakhlad ne kiba la kham rangbah. U la sa ialong paralok bad ki. U la set ia ki ha ka lynti jong ka jingieit bad nangta u la shongkurim ia ki. U la ju sah bad ka nongleitkurim katto katne sngi. Nangta un phet noh shi miet ryngkat bad ki tiar kordor jong ka nongleitkurim, ki jingdeng bad ki pisa.
Watla u la leh ia kane ka kam, Bun ki kynthei kim shym la ujor pyrshah ia u namar ka jingsngewlehrain Hynrei kawei ka briew kaba la shah thok ha u Feroze ka la mudui ha Nalasopara namar U la leh kumjuh ia kane ka kynthei ruh.
Hadien ka jingujor jong ka, ki pulit ki la thaw ia ka buit ban wad ia u nongshah kynnoh namar ki la shna ia ka social account ha ka kyrteng jong kawei ka kynthei kaba shu thok. La iakynduh ia ka Feroze. La kren shaphang ka jingshongkha bad u nongshah kynnoh u la shah thok kylla hynrei khlem da tip ia ka jingshisha ba ha kane ka kynti ki jingkhang phatok ki ap ia u. Ki pulit ki la kem biang ia utei u nongshah kynnoh. U nongshah kynnoh u la phla ia ka kam runar jong u.
Ki pulit ki la kurup kumba 3 lak eiei ka pisa, ki ATM jong ki khynnah kynthei, ki passbook bad kiwei kiwei ki tiar na une u rangbah uba thok ia ki khynnah kynthei ha ka kyrteng shongkha shongman.
Katkum ka jingïathuh jong ki pulit, une u rangbah u la pynlong ïa kiba bun ki khynnah kynthei kum ki nongshah thombor jong u ha ka kyrteng ka shongkha shongman ym tang ha Maharashtra hynrei ha kiwei pat ki jylla ruh. Ki pulit ka Palghar ki la kyrpad ia baroh ki longkmie ba lada phi iakynduh ia kum une u rangbah ha ka site kum ka shaadi.com, to check shwa ia u bad ia ka iing ka sem jong u. Lada don wat tang khyndiat eh ka jingartatien, te pyntip sha ki pulit shaphang kata.