“U Raj u ju khot ia ka Sonam didi (ka para).Ka Sonam ka la teh rakhi ia nga bad u Raj katba ngi dang don lang ha iing jong nga”, la ong u Govind raghuvanshi u hynmen ka Sonam ha ki lad pathai khubor ha ka sngi Balang.
Haba kren shuh shuh u la ïathuh ba u Kushwaha uba dang 21 snem ka rta u dei u nongtrei jong katei ka kam jong katei ka longïing bad u ju pynïaid ïa katei ka ophis.
“U Raj u dei tang u nongtrei jong ngi. U la trei ha ka ophis jong ngi la ar-lai snem. U ju pyniaid ia ka ophis bad pyniaid ia ki klient.”
U Govind, u la byrngem ruh ban iakhun na ka bynta ka Raja Raghuvanshi, da kaba ong ba dei ban ‘shah pyniap’ ia ka Sonam, lada lap ba ka donkti.
“Lada lap ba ka Sonam ka donkti, ka dei ban shah sdien phasi mardor, ngan thung hi dalade ia u nongiasaid ain ban iasaid na ka bynta ka iing ka sem jong u Raja Raghuvanshi ha ka Kashari”, u la ong.
“Nga don ryngkat bad ka jingshisha. Ka longïing jong u Raja Raghuvanshi ka la duh noh ïa u khun shynrang. Nga la panmap na ka longïing jong u. Ka longïing jong ngi ka la dkut noh ïa ka jingïadei bad ka Sonam” bynrap biang u hynmen jong u nongshah kynnoh ba hakhmat duh.
Ha kajuh ka por, ka kmie jong U Raj Kushwaha, ka Chunni Devi, ka kam ba u khun jongka, um don pop satia.
Haba iakren bad ka PTI kham mynshwa, ka la ong, “U khun jong nga u long uba khlem pop. La shah frame ia u. Kumno u khynnah ba dang 20 snem ka rta un leh ia ka kam runar kaba khraw haduh katne, dei tang ma u uba bsa ia ka iing jong ngi hadien ba u lok jong nga u la khlad noh na kane ka pyrthei.”
Ka la kam ruh ba u khun jong ka, u la leit wat sha ka jingleit ontep ia u Raja Raghuvanshi bad u la wan phai noh sha la iing da ki ummat.
“U khun jong nga u la sngewsih ia ka jingiap jong u Raja Raghuvanshi bad u la leit wat sha ka jingleit ontep ia u. Hadien ba u la wan phai na ka jingleit ontep u la iam shibun.”
“Nga la pyntngen ia u ba baroh kan sa long kaba bha bad kaei ka jingmyntoi ban iam mynta”, la ong ka kmie jong u nongleh thmu ba kongsan uba la shah kynnoh.
Ia ka metiap jong u Raja Raghuvanshi la lap ha ka 2 tarik Jylliew ha kawei ka kshaid kaba don ha weisawdong hadien ba u la jah rngai ha u bnai ba la dep ha ka por ba u leit shongkha shongkurim bad ka Sonam. Katba ia ka, ym shym la lap satia hangno hangno ruh tad haduh ba kan da wan pyndem noh ialade ha ki pulit ha Ghazipur.
La kem ia ka ha ka por ba ka la aiti noh, katba ki pulit ki la kem ruh ia u Raj bad ki lai ngut kiwei pat ki nongpyniap kontrak. Ka kynhun tohkit ba kyrpang jong ki pulit ka jylla Meghalaya ka dang tohkit ia kane ka kam.
