Shillong:
Ar tylli ki drone jong ka Pakistan ki la shah siat ha ki kynhun iada suin jong ki shipai India ha ka bynta jong ka Naushera jong ka Jammu and Kashmir ha ka janmiet jong ka sngi Palei, la iathuh ki tyllong khubor jong ka tnat iada ri ha ka ANI.
Kane ka la jia ha ka por ba ka jingïasiat suloi kaba jur ka la bthei ha shilynter ka Line of Control, ha kaba baroh arliang ki la ïakhun ha ka jingïasiat kaba jur bha sha shiliang pud. Kane ka jingjia ka long hadien ka jingjur jong ka jingïakynad hapdeng kine ki ar tylli ki jaitbynriew, ha kaba ki shipai India ki la pynhap ruh ïa ka liengsuiñ jong ki shipai suiñ jong ka Pakistan halor ka thaiñ Pathankot ha ka por mynmiet.
Ka tnat kam pohiing ka la ong ba ki shipai jong ka Pakistan ki la pyrshang ban siat ia ki jaka buh ktem shipai ha Jammu, Pathankot, bad Udhampur da kaba pyndonkam da ki namding bad ki liengsuin khlem briew.
“Ki station shipai ha Jammu, Pathankot bad Udhampur ki la shah thombor ha ki drone bad ki namding ba wan na Pakistan ha shi lynter ki khappud jong ka Jammu bad Kashmir mynta ka sngi,” la ong u nongaiktien ka tnat iada ri hynrei ka India ka la lah ban iada na kane ka jinghiar thma ka Pakistan.
Ha ka step jong ka sngi Palei, ka India ka la pynphai kylla. Ki shipai ki la pyndonkam ïa ki drone kamikaze bad ki namding ba la pynïaid thikna ban siat ïa ki kor ïada suiñ jong ka Pakistan ha kiba bun ki jaka, kynthup ïa ka Lahore.
Ki tyllong khubor hapoh ka tnad ïada ri jong ka India ki la kdew ïa ka jingïahap hapdeng ka jingpynbthei jong ki drone bad ki namding jong ka Pakistan bad ki jingpynbthei ha ka rukom jong ka Hamas ba la ïohi ha ki jingïakynad ba dang shen ha ka thaiñ Mihngi Pdeng.
“Ka Pakistan, ka pyndonkam ïa ki namding kiba long kum ki namding jong ka Hamas, ban siat ïa ki bun tylli ki jaka ha Jammu,” ong u tyllong khubor ka tnat ïada ri ha ka ANI. “Ki dur ba la ïohi halor ka Jammu ki pynkynmaw thik ïa ngi ïa ka jinghiar thma jong ka Hamas ïa ka Israel, kum ki roket kiba rem dor kiba bun jait. Ka kynhun shipai jong ka Pakistan ka treikam bad leh kum ka seng lehnoh Hamas,” ong ka tyllong khubor.
