Shillongf:
Ka long shisha kaba pynktah ia ka jingmut jingpyrkhat jong ki kmie ki kpa kiba haiing hasem ban iohi ba ki khun jong ki haba kip hah pulie ki shah pynshitom ha ki jaka sah jong ki ha hostel namar kane ka kaba pynkulmar jingmut halor ka jingragging ka la mih na ka SSN College kaba don ha Palnadu jong ka Andhra Pradesh.
Ha ka video kaba la paw mynta ha ki social media ha ka sngi Thohdieng, lah ban ïohi ïa ka kynhun ki samla pule kiba kham rangbah kiba la khot ïa ki samla pule kiba rit sha ka kamra jong ki ha ka por shiteng miet bad ki shoh ïa ki da ki dieng da ka jingleh mynleh ba ki dang shah hikai ha ka National Cadet Corps (NCC).
Ha katei ka dur, la iohi ba ki junior ki thiah ha baroh saw tylli ki kjat katba ki dang shah shoh. La lah ban iohsngew ia ki samla pule kiba la kham heh ba ki rkhie bad rkhie bein haba ki samla pule kiba dang rit ki la lynniar haba ki shah sympat da ki dieng, katba kiwei pat kiba don hapoh kamra kiba ring dur ia katei ka jingjia.
Kaba isynei ka long ia kine kiba dang khynnah ki la shah sympat beit na jingshong haduh ba kin da lyniar bad phah rung uwei hadien uwei ha kamra ba shong kine kiba la kham heh.
Ia kane ka video la sam ruh da ka YSRCP ha ki social media, da kaba kynthoh ia ka sorkar ba mynta halor ka jinglong jingman ka shongsuk shongsain ha ka jylla.
Ha ka SSN College ha Narsaraopet, Palnadu District, ki samla pule ki la shah pynshitom bein jur hapoh ka jingshaniah jong ka jinghikai NCC. Ia ki samla pule Junior la khot sha katei ka College ha ka por shiteng miet bad la shoh da ki dieng da ki samla pule kiba heh.
U Myntri kam pohïing ka TDP u la kynthoh ha social media ba katba ka ki pulit kim shym la leh eiei wat haba jia ka jingpyniap briew ha surok bah, ki i kumba kim khein snep ia ka jingpyndonkam ia ki dieng ha ka kam ragging Kane ka pynpaw ia ka jinglong jingman jong ka ain bad ka suk ka sain kaba mynta ha ka jylla.
Ki khubor ki iathuh shuh shuh ba ha ka sngi thohdieng, la kem ia uwei u samla pule ha kaba iadei bad kane ka kam ragging. Kane ka jingjia ka la paw shai ynda la pynsaphriang ia katei ka video clip ha ki social media.
Ka kynhun pulit ka la leit jngoh ia katei ka kolej bad pynlong ia ka jingtohkit. Ki samla pule kiba dei mynshem snem kiba donkti ki la pyndep ia ki eksamin jong ki ha u bnai March/April bad ki la leit phai noh sha la ki jong ki iing ki sem.
Da kaba pynshong nongrim ha ki jingkren jong ki samla pule bad ki sakhi video, ki pulit ki la ujor mukotduma bad la pynlong ia kawei ka jingkem, bad la khmih lynti ba kin sa don shuh shuh ki jingkem.