Shillong:
Ha kawei ka jingjia ba kyndit bynriew na Farrukhabad jong ka Uttar Pradesh, ka video kaba pynsngewsih ka la paw ha ki social media ha kaba la pyni ia kawei ka khynnah kynthei kaba la shah shoh bein.
Ha katei ka dur la pyni ba uwei u briew u la tan ia katei ka kynthei da u shniuh jong ka bad u la thombor ia ka da u dieng. Katba ka dang kyntait ban khih, uwei pat u samla u iasoh lang, u da mareh sha ka bad u slap ia ka da ka bor.
Katkum ki khubor, kane ka jingshah thombor kaba jur ka dei namar ka jingïakynad hapdeng arngut ki hynmen halor ki mar ki mata.
Ha katei ka jingjia ba shyrkhei, lai ngut ki briew ki la mynsaw jur.
Haba kynthoh halor katei ka video, da kaba leh round ha ki social media, u Additional Director General of Police (ADG) na ka bynta ka Kanpur zone u la kyntu ba dei ban leh eiei mardor ha kaba iadei bad katei ka jingjia.
Katba ha kawei pat ka jingjia, arngut ki Kanwariya ki la khlad noh bad 10 ngut pat ki la mynsaw hadien ba ka tractor-trolley jong ki ka la kylla ha Hapur kaba don ha sepngi jong ka Uttar Pradesh, ong ki pulit ha ka sngi Palei.
Kine ki Kanwariyas (ki riewblei Shiva), kiba sah ha Ghaziabad, ki dei kiba leit sha Brajghat ha Hapur ban leit tong um na Ganga.
U nongñiah jong katei ka tractor-trolley u la duh bor ïa katei ka kali bad ka la kylla ha kawei ka surok bah ha ka thaiñ Babu Garh ha ka por janmiet jong ka sngi Thohdieng. Kane ka trok ka kit palat 20 tylli ki Kanwariya ha ka por ba ka la hap, ong ki pulit.
Ia kito kiba la mynsaw ha katei ka jingjia aksiden la pynkit noh sha jaka sumar da ki kali pulit. Katto katne ngut ki Kanwariya, kiba la jur bha ka jingmynsaw, la phah sumar sha Meerut, ki la ong.