Hadien katto katne sngi ba kawei ka kynthei nongtrei jong ka seng Congress ka la shah pyniap bad la bret ia ka met jong ka hapoh ka suitcase, ka la mih ka video CCTV kaba pyni ia utei u nongshah kynnoh ba u tan ia ki tiar ha ka surok kaba thylli.
Ha katei ka dur, la iohi ia utei u briew uba deng ia ka mask, ba u dang kit ia katei ka tiar kaba dong ha ka por 10.16 baje mynmiet jong u bnai February.
Ia ka met jong ka Himani Narwal – kaba don ha ka rta kaba 20 snem tam – la lap ba la thep ha synduk suicase ka shor hajan ka jaka ieng bos ha Haryana Rohtak ha ka sngi saitjain.
Utei u nongshah kynnoh, u Sachin, la ngeit ba u dei u paralok jong katei ka nongshah pyniap. U la shah kem kham mynshwa mynta ka sngi halor ka jingkynnoh ba u la pyniap ia ka Narwal hadien ka jingiakynad kaba jur bha ha ka 28 tarik u February bad la kynnoh ba u la pyniap ia ka da ka charger mobile.
Utei u nongshah kynnoh u la ong ba ka la don ka jingialeh hapdeng jong ki arngut, bad ha ka por ba ki ia kren, u la pyniap ia ka. Hadien ba la pyniap ia ka, u Sachin u la shim ia ki jingdeng bad ka laptop jong ka bad u la shong da ka scooter jong u sha Jhajjar ban buhrieh ia kine ki tiar ha ka dukan jong u,” la ong u Additional DGP u K K Rao ha ki nongthoh khubor.
U la leit phai biang sha iing jong ka tang hadien kata, u la thep ia ka met jong ka ha ka pla bad u la kiew ha kawei ka kali ryngkat bad ka pla, la ong u Mr Rao, da kaba bynrap ba u la hiar hajan ka jaka ieng bus Sampla ban pynlong ia ka jingtohkit, bad shisien ba ka kali ka la leit noh, u la bret ia ka pla.
La thang ia ka Narwal mynha ka janmiet. Kham mynshwa, ki bahaïing jong ka ki la kyntait ban thang ïa ka met jong ka tad haduh ban da kem ïa u nongleh kam sniew.
U Myntri rangbah barim ka Haryana, u Bhupinder Singh Hooda, ha ka sngi U Blei, u iathuh ba u la iakren bad u superintendent jong ki pulit jong ka Rohtak, ha kaba iadei bad ka jingtohkit halor katei ka kam pyniap briew.
U MLA ka Congress na Rohtak u Bah BB Batra u la ong ba ka Himani ka dei ka nongtrei kaba “bha bad kaba trei shitom bha” bad ka ju leit sha ki prokram jong ka party.
“Kito kiba la leh ia ka kam runar ki dei ban shah pynshitom da kaba tyngeh,” u Batra u la ong .
