Shillong, Nailar 18:
Ka Shillong Lajong FC kan sa iakhun pyrshah ia ka East Bengal ha ka Quarter final ka jingialehkai phutbol kaba 133 sien jong ka Durand Cup ba la pyniaid da ka Durand Football Tournament Society bad ka All India Football Federation ka ban long ha ka 21 tarik mynta u bnai Nailar 2024 kaba dei ka sngi Balang ha ka por 7:00 baje janmiet ha Jawahal Nehru Stadium, Shillong.
Ka jingioh rung ka Shillong Lajong sha ka Quarter final ka dei hadien ba la lah ban iakhaid bad ka FC Goa da mar shi kol ha ka jingïakhun ba kut jong ka Group F ha madan Jawaharlal Nehru ha Shillong ba kan kiew hajrong duh na baroh ki saw tylli ki team.
Ka Shillong Lajong ka la dei ban jop ia ka Goa hynrei namar u rangap kol ka Goa u la mih shabar u lain ban kynjat beit thar na tynrai kpoh ia u rangialehkai Lajong uba la ioh rah marwei ia ka bol haduh ba un da kyllon ha madan.
Napdeng ki phra tylli ki team kiba la rung sha ka quarter, 6 tylli ki team ki dei kiba ialehkai ha Indian Super League kaba dei ka jingialehkai ba heh duh ha India hynrei ha kane ka jingialehkai ha ka wat kaba ar kan kham itynnad namar ka Shillong lajong kabym don ha ISL bad ka Indian Army kin iaknieh ban rung sha ka Semi Final.
Kine ki 6 tylli ki team ISL kiba rung sha Quarter ki long ka North East United, East Bengal, Mohun Bagan, Punjab, Bengaluru bad Kerela Blaster.
Ka jingkmen ki paidbah kiba wan peitkai ia ka jingialehkai ka Shillong Lajong bad Goa ka dei hadien ba la wai ka jingialang la pynbna ba ka Shillong Lajong kan ioh rung sha Quarter Final kan sa iakhun biang ha Shillong namar kin sa iohi biang da la ki jong ki khmat ha madan Polo.
Haba phai ha ka jingialehkai ha madan Polo u rangkynsai ka Lajong u Marcos Rudwere Silva u la thep nyngkong ïa ka shi kol ha ka minit kaba 29 kaba la pynlong ia ki nongkyrshan ban kynhoi bad risa baroh shi madan kaba ki nongpeitkai ki la poi palat 14 hajar ngut.
Hynrei khlem poi pyrkhat ba u rangialehkai ka Goa u Devendra u la ioh ban pynphai ia ka kol kaba 32 minit kaba la pynduh mynsiem shipor ia ki paidbah nongkyrshan ka Lajong.
Haba la iaid ka minit kaba 79 u Silva u la ioh ban rah marwei ia ka bol hynrei u rangapkol ka Goa uba la mih shabar u lain u la leit kynjat beit ia ka kpoh haduh ban da kyllon bad dei hangne u refree u la sei beit da ka redcard ban beh ia une u rangapkol ka Goa shabar ka madan.
Watla ka Goa ka la ialehkai satang 10 ngut hynrei ka Shillong lajong ka khlem ioh ban thep kol hynrei watla ka iakhaid haduh bakut ka la ioh rung pat sha ka quarter namar ka Goa ka la shah thep 5 kol katba ka shillong lajong ka la shah teng tang shi kol ha baroh lai tylli ki jingialehkai.