Dhaka:
Ka jingiakhih ki samla pule ha ri Bangladesh ka la poi shaduh u pud ba uwei u samla shynrang u la rung syndon shaduh ka kamra thiah ka myntri rangbah duh barim ka Bangladesh ka Sheikh Hasina hadien ba ka la hiar shuki bad leit sah noh sha India.
La iohi ba ki paidbah kiba la leit tur sha iingsah ka Sheikh Hasina ki paidbah ki la tuh ia ki saree, ki khuri sha, ki tv set, ki jingdro dur ki dei napdeng kiba bun ki tiar kiba la tuh da ki nongïakhih kiba la wan thombor ïa ka ïing syiem jong ka Sheikh Hasina ha Dhaka ha ka sngi Nyngkong.
Ki jingiakhih ha Bangladesh kiba la sdang kum ki jingiakhih ba la ialam da ki samla pule pyrshah ia ki kyndon thung kam jong ka sorkar ha u bnai Jylliew ki la kut ha ka sngi Nyngkong ha kaba u myntri rangbahduh u la phet krad bad ki shipai ki la pynbna ba kin thaw ia ka sorkar ba shipor.
Ym duna ia ka 300ngut ki briew ki la iap ha ki jingiakhih kiba la pyniap briew haduh palat shibnai kiba la pynkut noh ia ka jingsynshar jong ka Myntri Rangbahduh ka Sheikh Hasina kaba la 76 snem ka rta.
Ki jingiakhih ki la nang jur wat la katei ka skhim ka la shah pynduna da ka iing bishar ba ha khlieh duh jong ka Bangladesh.
Ki channel ha Bangladesh ki la pyni ia ki dur jong ki paidbah kiba mareh sha katei ka compound, kiba kner kti sha ka camera katba ki dang lehkmen, kiba lute ia ki tiar bad ki kot katba kiwei pat ki shongthait ha ki jingthiah.
Ki dur ha ki social media ki pyni ia ki nongiakhih kiba sngewkmen ba ki iaid lyngba ki drawer bad ki tiar jong ka.
Katto katne ki dur na katei ka jaka ki pyni ia ki nongiakhih kiba ialehkai, kiwei pat ki rah ia ka dohkha kaba heh bha. La iohi ruh ia uwei u briew uba phong da ka sari, kaba la kynnoh ba ka dei jong u myntri rangbah barim.
Ki nongïakhih ki la pynpra ruh ïa u mot jong u kpa jong ka Hasina u Sheikh Mujibur Rahman, u riewshlur jong ka jinglaitluid jong ka ri.
Ki paidbhur ki la hiar thma ruh ïa ki ïing jong ki paralok ba jan jong ka Hasina.
Ki 15 snem ba bud ryntih jong ka Sheikh Hasina ha ka bor synshar ki la paw da ka jingkha thymmai ha ka ioh ka kot hynrei ruh da ka jingshah kem paidbah jong ki nongpyrshah sain pyrthei bad ki jingpynjari hok longbriew manbriew pyrshah ia ki bor pahara jong ka.
Ka Hasina, 76 snem ka rta, ka la jop ha ka sien kaba phra kum ka myntri rangbahduh ha u bnai Jymmang hynrei ka liang pyrshah ka la khanglad ia ka vote kaba ka la ong ba kam long kaba laitluid bad kaba hok, .
Ka la kular ha u snem ba la dep ban pynkylla ia baroh kawei ka Bangladesh sha ka “ri kaba roi bad kaba la roi” hynrei kumba 18 million ngut ki samla Bangladesh kim don kam shuh, katkum ka jingkhein jong ka sorkar.
Da ka jinghiar shuki ka Sheikh Hasina ki bor shipai jong ka Bangladesh kin pyniaid shipor ia ka sorkar ha katei ka ri.
