Kolkata, Nailar 13:
U Sanjoy Roy, uba shah kynnoh ha ka kam leh beijot bad pyniap briew ia ka samla kynthei kaba pule doktor ha Kolkata ka RG Kar Medical College and Hospital um don jingsngewsih ne jingsngew pop ei ei ba u la leh ia kum kane ka kam runar kaba shyrkhei.
Katkum ki lad pathai khubor na katei ka thain, hadien ba u la shah kem bad leh ia katei ka kam, u Sanjoy Roy u la ong ia ki pulit ba kin sdien phasi ia u lada ki kwah.
Ka jingjia ba shyrkhei jong ka jingshah leh beijot bad shah pyniap jong ka ‘Abhaya’, ka doktor ba dang shah hikai ha ka RG Kar Medical College and Hospital ka la pynkyndit ia ka ri india baroh kawei.
U nongshah kynnoh ha ka Kolkata Horror, u Sanjoy Roy u la shah kem ha ki pulit bad u don ha kti jong ki pulit haduh ka 23tarik Nailar 2024.
Hadien ba la kem ia u ha ki pulit jong ka Kolkata, u Roy u la phla ia ka kam runar jong u bad um don kano kano ka jingsngew pop ne jingsngewsih ia kaei kaba u la leh.
Ki lad pathai khubor ha ka thaiñ ki ïathuh ba hadien ba u la phla pop hadien ba la kem ïa u, u la leit ban ong ïa ki heh pulit, ban sdien phasi ia u lada ki kwah’.
U Sanjay Roy, uba dei u nongshah kynnoh, uba la shah kem ha ka kam leh beijot bad pyniap ia u doktor ba shah hikai ha ka RG Kar Medical College and Hospital jong ka Kolkata, u dei uba trei kum u civic volunteer ha ka police welfare board.
U la don ka histori jong ki jingshongkha kiba la pulom bad katkum ka jingong ki pulit, la lap shibun ki jingthoh kiba sniew ha ka phone jong u.
ha ka por mynstep jong ka 9 tarik u August, la lap ia ka met jong ka doktor ba dang shah hikai ha ka jinglong kaba lyngkhuid shiteng ha ka kamra seminar jong ka hospital; u nongshah kynnoh u la leh ia ka kam runar bad nangta u la leit noh, u la sait ia ki jain ban pynduh ia ki sakhi.
Katba u dang mih, u Sanjoy Roy u la ieh noh shadien ia ka bluetooth headset jongu, kaba la pyniasoh ruh bad ka phone jongu; kane ka la long ka jingïalam kaba kongsan bha na ka bynta ki pulit, kaba la pynlong ïa u ban shah kem.
Ki doktor bad ki bym dei ki doktor ki la pynmih ia ka sur pyrshah ia kane ka jingpyniap briew kaba shyrkhei bad kane ka jingjia ka la wanrah ruh ia ki jingkylli shaphang ka jingshngain jong ki kynthei ha man la ka por, wat ha ki jaka trei jong ki ruh.
Ki samla pule doktor ki la khot ia ka jingiakhih ha baroh kawei ka ri bad ki doktor ki la pynsangeh ruh ia ka jingshakri ha kylleng ka ri, kynthup ha Maharashtra, Delhi, Thiruvananthapuram bad Kolkata.