Shillong, Naiwieng 16:
Ki paidbah kiba la poi palat phew hajar kaba la shu antad ym duna ia ka 60 hajar ngut kiba la poi ha tamasa Cherry Blossom ki la hun shisha ka mynsiem hadien ba ki la ioh ban sngap ia ki jingrwai kiba bang ba thiang jong u Akon uba la wan rwai ha tamasa Cherry Blossom kaba la long mynha ka 15 tarik Naiwieng 2024 ha Bhoirymbong, Ribhoi District.
Watla u Akon uba dei na America bad Senegal u la thait ban rwai ha rynsan haba u la rwai palat shi kynta shiteng hynrei ki paidbah ki la pyrta ba kim pat thait u Akon u la sdang ban rwai ha ka por 10 baje mynmiet haduh 11:30 mynmiet da ki jingrwai kiba pawnam bha kum Smack That, Dangerous, I wanna love you, Chammak Challo bad la pynkut da ka jingrwa Freedom bad kiwei de ki jingrwai kaba ki paidbah ki sngewtynnad.
Ha ka por ba u rwai u Akon u la leit khublei ia ki paidbah bad iarap ring video ia ki paidbah haba u rwai ha rynsan.La iohi ruh ba ka madan Kurkalang ha Bhoirymbong ka la dam smam mar shu sdang rwai u Akon kaba ki paidbah ki la wan na kylleng ki jylla.
Hadien ba la dep rwai u Akon ha ka por 12:00 baje shiteng synnia la rwai sa ka kynhun rwai Boney M.Haba phai ha kane ka tamasa Cherry Blossom ki paidbah ki la kham bun ban wan poi ha ka por janmiet.
Hashwa ba u Akon un kiew sha rynsan la ioh ban rwai ki nongtem napoh ka jylla, ki DJ ba la wanrah kyrpang ban pynsngewtynnad ia ki paidbah.Ia kane ka Cherry Blossom yn sa pynkut mynta ka sngi ka 16 tarik Naiwieng 2024 ha ka juh hi ka jaka ha kaba yn wan rwai da ka kynhun Clean Bandit bad kiwei de.
Namar ki paidbah kiba la thait ban shad ban rwai lang haba rwai u Akon, la iohi ba ki don ki katto katne ngut ki paidbah ki la mih noh na madan shwa ba ka kynhun rwai Boney M kan kiew sha rynsan.
Hadien shiteng kynta ba la kut rwai u Akon, la bteng sa ka kynhun rwai Boney M ha ka por 12:00 baje mynmiet la mih sa ka kynhun rwai Boney M kaba ki la rwai ia ka jingrwai Sunny, Daddy Cool, Brown Girl in the Ring, river of babylon bad kiwei de.Haba ki paidbah ki la sdang mih na madan ha ka por 12:00 baje shiteng synnia mar shu kut rwai u Akon, ka jingsahkut ki kali ka la bteng haduh saw baje mynstep jong ka sngi saitjain kaba dei ka 16 tarik mynta u bnai.Ka jingdheng kali ka la jur ha surok bah Guwahati sha Shillong By pass namar la iakynduhlang ki trok kiba iaid ha surok bah bad ki kali kiba wan ha tamasa Cherry blossom.
Wat ki heh ki hain ne ki VIP kiba la ai lynti ban rung ban mih la ka jong ruh ki dang sahkut kali namar kim lah ban iaid namar ka jingdheng kali ka la jur ha surok bah kat haduh ba don kiba la ioh thiah hapoh kali.Ka jingdheng kali ka la duna tad ynda la dei ha ka por 4 baje mynstep hynrei kiba leit na Bhoirymbong sha ki thain Mawryngkneng ka deng jur ka jingsahkut namar ba la bun sa ki trok.
Katba ki kali ki dang jur ka jingsahkut ka jingtem ia ki jingrwai ha Cherry Blossom ka iaid beit haduh ban da shai ka bneng namar ki dang bun kiba iashad ia kmen hapoh madan.La iohi ruh ba ki don ki samla kynthei bad shynrang ki bym ioh kali shuh ki la hap iaid da ka kjat haduh ka por 4:30 mynstep namar la iohi lynti ka surok bah na Bhoirymbong shaduh Umeit ki dang don kiba iaid kjat.
Shuh shuh la iohi ba ki don ki kali kiba la ieng harud surok namar ka jingshoh samthiah bad ka jingbym don shuh ki jaka ieng kali ha ki jaka sah basa.