Shillong, Naiwieng 25:
U Bah Pynïaid Sing Syiem CEM ka KHADC mynta ka sngi Saitjaiñ ka 25 tarik Naiwieng 2023 u la plie paidbah ïa ka Community Health Park ha ka Shnong Lawsohtun.
Ia kane ka community Health Park la shna bad pynlut hi na ka pla tyngka jong ka Dorbar Shnong Lawsohtun khlem kano kano ka skhim bad lyngba ki katto katne kiba la noh synñiang.
Ha kane ka sngi, la sakhi lang ruh u Bah Hamletson Dohling MLA barim ka Mylliem Constituency kum u Symbud kongsan, Bah Harribert Rynjah rangbah Shnong Lawsohtun, ki dkhot ka executive committee, LUSSCO, ki longkmie longkpa bad ki samla shynrang bad kynthei.
U Bah Pynïaid Sing Syiem haba kren kum u kongsan ha ka jingïalang kaba la pynlong ha Lawsohtun Sports Complex, u la pynpaw ka jingai khublei ia ka dorbar Shnong kaba la lah ban shna ia kane ka park kaba dei shi bynta ban ïarap ia ki paidbah ba kin pyndonkam ha ka liang ka koit ka khiah.
U la ïaroh ruh ba ka Shnong Lawsohtun kadei ka Shnong kaba la kiew shaphrang ha ki liang baroh khamtam ha ka liang ka jingialehkai sport ha kaba ka la don la ka jong ka jaka ai jinghikai lane ki academy ha ki jait jingïalehkai bapher bapher.
U la ong ba District Council kan nang ïatreilang ryngkat bad ka shnong bad ruh ban ïarap katba lah ei ha kaban kyntiew ia ka Shnong ka thaw ha ki liang baroh.
U Bah Hamletson Dohling haba kren kum u Symbud Kongsan, u la ai ka jingïaroh ia ka dorbar Shnong Lawsohtun kaba la lah ban shna ia kane ka Health Park khlem kano kano ka skhim.
U la ai khublei ia ki nongïalam Shnong kiba la lah ban ai ka jingshakri ia ki paidbah nong shong Shnong.