Shillong, Naiwieng 11:
U President barim ka Hynñiewtrep Youth Council u Bah Robertjune Kharjahrin mynta ka sngi u la ïathuh ba hadien ba u la shongthait noh na ka jingshakri ia ka jaidbynriew lyngba ka sengbhalang u la rai ban rung noh pat ban ai jingshakri ïa ka jaidbynriew lyngba ka kam saiñ pyrthei.
Haba ïakren sha ki lad pathai khubor u Bah Robert u la ïathuh ba kumba u la leit ban Pynïasoh sha ki seng bhalang kata ka KSU bad ruh ka HYC ka thong ne ka mission jong u ka dei beit ban ai ïa ka jingshakri na ka bynta ka jaidbynriew bad ong ruh ba ka rai ban rung sha ka saiñ pyrthei ka dei ban dang ïai bteng ïa kane ka kam.
Haba kylli u la ïathuh ba u la tyrwa sha ka kynhun synrop lang ka UDP bad HSPDP ka Regional Democratic Alliance (RDA) ba un long kum u kyrtong ïa mon lang kine ki ar tylli ki party kiba rim bad kiba la ïoh jingshaniah na u paidbah ha ka elekshon MP kaban long ha u snem ban wan.
Haba kylli u la jubab ba ia mynta um pat lah ban ïathuh la un rung sha ka UDP ne HSPDP hynrei un sa pyntip ha kine ki sngi kiban wan.