Shillong, Jymmang 09:
Kawei ka longkmie khasi kaba kyrteng Basuklin Shabong kaba shong basah bad la u kurim uba dei u bar jylla ka la phla ba shwa ba kan sah ha Lum Survey kaba don ha lyndet ka jaka ka them metor ka la sah ha Mawlai Kyntonmassar bad Umsohkrot.
Ka jingphla kane ka longkmie ka dei ha ka por ba ki nongialam ka Hynniewtrep Youth Council (HYC) sengkmie, u Additional Deputy Commissioner ka East Khasi hills District, Municipal, Cantonment ki leit ban lum jingkhein ia ki briew bad ki iing kiba sah be-ain ha jaka ka Defense Estate.
Kane ka longkmie ka la iathuh ba ka la sah bad u kurim u Moni Roy mynta la 15 snem ryngkat ka kiaw bad kiba haiing hasem.
Une u Moni Roy u la iathuh ba mynshwa u sah ha Club bad mynta u la sah ha Lum Survey haba u la iakynduh bad ka Basuklin Shabong hynrei um don EPIC u don tang ka Adhar Card.
Ha kane ka jaka la iohi ba uwei u shynrang uba kam ba u dei u khasi u ioh lok da ka kynthei bar jylla kaba ki shong ki sah ryngkat palat 80 tylli ki longiing.