Shillong, Nohprah 09
U Chief Executive Member ka Khasi Hills Autonomous District Council (KHADC) bah pyniaid syiem u la phla ba u dang dei uba dang samla tangba u la don samla mynta da kaba u wad para jaidbynriew lajong.
Kane ka jingphla u bah pyniaid syiem ka long shibynta ban kyntu ia ki samla kane ka juh mynta ba kin kiar ban wad samla da kiwei ki jaidbynriew hynrei ki dei ban jied beit da u ne ka samla para jaidbynriew lajong.
Ia kine ki kyntien u bah pyniaid syiem u la pynpaw haba u kren kum u kongsan ha ka jingialang sam khusnam maitshaphrang award kaba 16 jong ka Khasi Student Union Sohiong circle ia ki 50 ngut ki samla pule kiba wanshakhmat ha ki jingpule bapher bapher kaba la long mynta ka sngi ka 8 tarik nohprah 2023 ha Sohiong.
Ha kane ka sngi la iadonlang u MDC ka Sohiong-nongspung constituency bah sherborlang mawlong, u acting Lyngdoh ka hima sohiong bah Pedion L Thabah, ki samla pule bad ki kmie ki kpa.
U bah Pyniaid u la ong ba bun ha ki jaka khaii ki dei beit kiwei ki jaidbynriew kiba pyniaid hynrei ynda la peit bha ki pyndonkam da ka kyrteng jong ki dkhot ka jaidbynriew, kumta ban khlain ka jaidbynriew dei ban kiar ban wad samla da ki bar jylla.
U la pynpaw ba ha ka dustur u khasi la ai jait sha ka kmie ka don ia kata ka kheinkur kheinkha.
U la pynpaw sngewsih ban iohi ba ka jylla ka riewspah ha ki marpoh khyndew hynrei la shah knieh noh ha kiwei katba u trai shnong u shu long tang nongbylla.
Katba u MDC ka Sohiong nongspung constituency bah Sherborlang u la pynkynmaw ba ha ka por ba u dang samla u leit klas mynstep bad leit kit daju sha iew hynrei baroh ka dei beit kajingtrei shitom.