KHASI INDIA

Shillong, Kyllalyngkot 26:

U MLA ka Voice of the People Party (VPP) na North Shillong constituency bah Adelbert Nongrum u la pynthikna ba ki saw ngut ki MLA kin nym iapein bad ka shuki namar ki paidbah ki la jied ia ki ha ka ilekshon khlem da pyndonkam pisa.

Ia kine ki kyntien u bah Adelbert Nongrum u la kren ha ka jingialang ka VPP ha YMCA Mawkhar kaba la long mynta ka janmiet sngi Palei ban pynshai sha ki paidbah halor ka jingshah weng kam ki ophisar ha ka Lokayukta kaba dei ban peit ia ki kam bamsap hapoh ka jylla.

U la ong ba la seng ia ka VPP ban rat dyngkong ia ka kam bamsap namar ha kine ki sanphew ar tylli ki snem la jyllei tang ka bamsap kaba la tuh ia ka hok jong ki pateng ban wan.

“Ngim shym la thaw ia ka seng VPP ban ialam bakla ia ki paidbah hynrei ban kren ia ka hok bad ka jingshisha” u la ong.

 U la phla ruh ba ki saw ngut ki MLA ki la pyrshang ban pyndep ia ka kamram ha iingdorbar thawain ban kren ia ki mat jong ka jaidbynriew hynrei namar ba duna ki MLA ym shym la poi sha ka thong.

Shuh shuh u bah Adelbert u la pynkynmaw ba ka jingshah leh be-ain ia u nongthaw ain ha kiba bat ia ka ain khlem da buh kyrteng bad kahdur khmat ka pyni ia ka jingkhawpud.

“Haba ngi leit sha iingdorbar ngi da buh ia ka kyrteng ban ithuh hynrei ki pulit kiba bat ain ki buhriew kyrteng ialade, hynrei kum ka seng ngin shim ia ka ain kaba tyngeh khnang nym jia shuh” u la ong.

Ha ka juh ka por u la ong ba ka Lokayukta ka dei jong ki paidbah kumta u la kyntu ia ki paidbah ban long kiba la pynkhreh ban iakhun ban pynduh jait ia ki kam bamsap.

Share this news

Leave a Reply

Your email address will not be published. Required fields are marked *