Shillong, Naiwieng 02 :
Ka Hynñiewtrep Achik National movement ka la byrngem ban shim da kiwei ki sienjam la ka long da ka kam be aiñ lane kaba don aiñ lada ka sorkar jylla lyngba ka regional committee kam lah ban tuklar ban pynsangeh mardor ïa ka jingshna be aiñ ka sorkar Assam ïa ka surok ha Bakhlapara ha Ri Bhoi District.
U Bah Kyllang S Thongni General Secretary ka seng HANM Seng Kmie haba kren sha ki lad pathai khubor mynta ka sngi Saitjaiñ hadien ba la wai ka executive committee, u la ïathuh ba ki dkhot ka seng na Ribhoi ha ka jingleit jurip ki la lap ba ka sorkar Assam ka la shna be aiñ ïa ka surok ha Bakhlapara.
Ka seng ka la ai por ba hapoh 10 sngi ka regional committee ka dei ban tuklar ban pynsangeh mardor ïa ka jingshna be aiñ ka sorkar Assam ïa katei ka surok bad Maham ba lada kam lah ban tuklar ha kitei ki sngi ba la buh ka seng kan hap ban leh da ki kam la ka long da ki kam be aiñ lane kiba long katkum ki aiñ.
“Ka kam pynbeit pud pynbeit sam kadei ka mat ba hakhmat eh ba la thaw ïa ka HANM, ngi ai por 10 sngi ïa u Chairman ka Regional Committee ba un tuklar ban pynsangeh mardor ïa ka jingshna be aiñ ka sorkar Assam ïa ka surok ha Bakhlapara. Lada kam lah ban tuklar ha kine ki 20 sngi, ka seng kam banse ban shim da kiwei ki sienjam, la ka long da kaba be-aiñ lane da kaba don aiñ,” ong u Bah Kyllang.
U Bah Kyllang S Thongni u la ïathuh ruh ba ha kine ki khyndiat sngi ka seng HANM kan sa lum ïa ka jingïalang bad ki nongïalam ka Hima Nongspung, kynthup u Syiem ryngkat kiwei kiwei ha ryngkat ki dkhot ka HANM Western Ri Bhoi ban ïakren ha kaba ïadei bad katei ka jingwan tam pud jong ka sorkar Assam hapoh ka jylla Meghalaya,”.