Shillong, Jymmang 22:
U General Secretary ka Khasi Student Union (KSU) Sengkmie u samla Donald Thabah u la ong ki pulit ki thwet beit ia ki dkhot ka KSU lada don kano kano ka jingshah pyniap namar ka seng haduh mynta kam don kano kano ka jingiadei bad ka sorkar.
Haba buddien ia ki dkhot kiba la shah kem halor ka jingkynnoh ba shah pyniap ki bar jylla ha Ichamati bad ha Mawlai,u samla Donald u la pyntip ba ki don san ngut ki dkhot ka KSU kiba shah pharep ha ki pulit bad mynta la iaid shibnai tam eiei ki dang ngat beit ha ka jingtohkit ki pulit.
U la ong b aka KSU kam u don jingiadei bad kano kano ka sorkar lada dei kaba rim ne ba thymmai nakata ka daw ki pulit ki thwet beit ia ki dkhot ka KSU lada don kano kano ka jingshah pyniap ia ki bar jylla.
“Kumta ka seng ruh kan iakhun beit ban pyllait ia ki dkhot kiba la shah kem namar ka dei tang ka jingkynnoh ki pulit” u la ong.
U la pyntip ba napdeng san ngut kiba la shah kem, saw ngut ki dkhot kiba dei na Sohra la pharep halor ka jingshah pyniap ki bar jylla ha Ichamati bad uwei u dkhot ka KSU na Mawlai la pharep halor ka jingshah pyniap ki nongtrei bar jylla ha Mawlai.
U la pynkynmaw ba ki pulit ki ju pynngat shibun ki jingkynnoh ia ki dkhot ka KSU khamtam haba iadei bad ka jingiakhih ILP bad kiwei de hynrei kim da peit than ia kiwei pat ki seng.
U la ong ba watla ki pulit ki thwet ia ki dkhot ka KSU hynrei ka seng kan nym kynrandien ban iada ia la ka jong ka jaidbynriew rit paid.