Shillong, Jymmang 17:
Uwei u nongkienglieng ha wah Umngot u don jingkyrmen ba ki nongjngohkai pyrthei kin wan noh sha Dawki bad kiwei ki jaka ha Meghalaya hadien ka jingjia ba sngewsih ba dang shu dep ha Pahlangam, Kashmir.
Kane ka jingpynpaw u nongkienglieng ha wah Umngot kaba hap ha shnong Dawki ka dei haba u nonglum khubor U Nongsain Hima na Shillong u la hiar kyrpang ban sngap ia ka sur jong ki paidbah haba iadei ka jingpynjari curfew ka sorkar ha ki khappud Bangladesh hadien ba la mih ka jingiakynad ka India bad Pakistan namar ka jingshah siat ki nongjngohkai pyrthei ha Pahalngam.
Une u nongkienglieng u don jingkyrmen ba ki nongjngohkai pyrthei kiba dei na India ne shabar ka ri India kiba thmu ban leit sha Kashmir kin wan noh sha Meghalaya hadien ka jingshah siat ha Pahalngam.
Katba kawei ka longkmie kaba die sha ha trai ki dieng kwai harud ka wah Umngot ha Dawki ka la iathuh ba naduh ba shah siat ki briew ha Pahalngam ka la hiar hi ka iew namar ki nongjngohkai ki don kiba sngewartatien ban wankai sha Dawki namar ka don markhap bad ka Bangladesh hynrei mynta kim don shuh ka jingsngewtieng.
Kumban shu pynkynmaw ha kine ki ar snem ki dukan kiba shongdie ha trai diengkwai ki dang duna hynrei mynta kane ka jaka kaba don harud wah umngot ki la sdang bun ki dukan die soh bad dukan sha ban pynkhreh ia ki nongjngohkai pyrthei.
Shuh shuh mynta ki shipai BSF ki la wah da ka jingthoh ba kim shah shuh ban ring video lada leit sha wah Umngot kaba don markhap bad ka Bangladesh naduh ba mih ka jingiakhih kaba jur ha Bangladesh hynrei la shah tang ban shondur.
