Shillong, Jylliew 07:
U kpa uba kit ba bah ia ka iing ka sem u la pynpaw ba ma u bad ka kmie ki kwah palat ban pynsngewbha ia ka Syrpailin Wahlang kaba dei ka khun kaba hynniew na ki phra ngut hynrei kim sngewthuh namar kam lait kren naduh dang kha.
Haba iakren bad u kpa bah Stainhing Nongsiej uba n aka shnong Nongstoin u la iathuh ba u la sdsang ban lap ba ka Syrpailin Wahlang kam lait ban kren ynda la poi ha ki 9 bnai namar ka shu iam bad rkhie tangba kam lait kren namar kam ioh sngew kumba long lem kiwei ki khyllung.
U la iathuh ba Syrpailin ka lait tang ban khot ‘Pa’ lait nangta kam lah ban kren hynrei kam ju thlia pat naduh dangrit.
U la iathuh hadien ba la dep test ha Laitumkhrah sa tip ba kane ka khun kam ioh sngew haduh 100 percent.
“Haba ka la sdang heh ka don ka jingeh hynrei ngi kren la ka kren ban pyni da ka kti hynrei haduh ban da wan phah skul sha Ferrando Speech and Hearing Centre kaba don ha Umniuh Khwan, Umsning Block, Ribhoi District ka jynjar ban iapyni da ki kti namar ki la hikai da kawei ka rukom” u la ong.
U la iathuh haba la phah skul sha shnong ka la nang ban thoh kyrteng lajong bad kyrteng kmie bad kpa hynrei namar la kwah ban phah skul kiba biang la phah sha kane ka skul haba la kynjoh sha ka 8 snem.
“Ngi sngewkyndit ban ioh ia ka khubor b aka khun ka ioh bun mak bha ha ka jingkhein hynrei ngim lah ban phah sha ki kyrdan bah eh namar ba ban ka jingduk” u la ong.
U kpa u la ai khublei ia kiba pyniaid ia kane ka skulk aba la hikai bha ban wan shaduh shakhmat ha ka eksam matrik mynta u snem.
Watla ka Syrpailin Wahlang kam shym la lait kren naduh ba wan long briew ha sla pyrthei hynrei kaba la pynkyndit lut ia baroh ki para khynnah skul bad ia ki nonghikai jong ka Ferrando Speech and Hearing Centre kaba don ha Umniuh Khwan, Umsning Block, Ribhoi District ka dei namar kane ka khynnah ka la ioh heh mak ia ka jingkhein haduh 84 mark bad wan kyrdan ba ar ha ka eksam Secondary School Leaving Certificate 2024 ba la pyniaid da ka Meghalaya Board of School Education.