Shillong, Naitung 26:
Ka samla khasi kaba trei ha kawei ka restaurant ha Sylhet kaba dei kawei ka sor ha Bangladesh ka la sdang ban mih na iing ban leit shet jingbam naduh ka 24 tarik mynta u bnai hadien b aka sorkar Bangladeesh ka la pyllait ia ka curfew naduh ka por 10 baje mynstep haduh ka 5 baje janmiet.
Haba iakren bad ka kong Sahila Pohtam kaba dei ka samla khasi kaba sah ha Bangladesh ka la iathuh ba ka jingiakhih ha Bangladesh ka la kham jai jai hadien ba ki samla pule ki la sangeh shipor ka jingiakhih namar ka jingiap bun briew palat.
Ka la iathuh ba mar shu pyllait ia ka curfew ki paidbah ki la mih na iing ban leit iew leit hat ban leit trei leit ktah.
Ka la iathuh ba ki trai jong ka company kaba don ha Dhaka ki la phah ia ka ban leit shet jingbam ha Restaurant hadien ba la plie ia ka iew ka hat namar bun ki nongtrei kim pat nud ba wan trei.
Haba kylli la ki dang don ne em ki khasi kiba pule doktor kiba dang sahkut ha Sylhet, ka la iathuh ba kam don jingtip shuh namar haduh mynta ka sorkar Bangladesh ka dang khang ia ka internet bad ka network mobile phone.
U nongsain Hima u la ioh ban buddien ia ka kong Sahila lyngba ka jingiakren da ka whatapp namar ka ioh ban pyndonkam da ka wifi haba ka don ha restaurant.
Ka la iathuh ba watla ki khasi ki bun kiba sah ha Bangladesh hynrei ki imsuk imsain kim don kano kano ka jingshah pyndik watla kane ka jingiakhih ka jur bha ha Bangladesh.
Kumban shu pynkynmaw ki samla pule na Meghalaya ki la ioh ban wanphai noh na Bangladesh namar ka jingiakhih kaba jur ha kane ka ri tang namar ka jingdawa ban pynduhnoh ia ka jingbhah kam sorkar.