Shillong:
Kawei ka samla na Uttar Pradesh, kaba kyrteng ka Ujala Yadav ka la kam ba ma ka bad ka Sonam Raghuvanshi, kaba shah kynnoh ba ka la pyniap ia u kurim lajong, U Raja Raghuvanshi ha Meghalaya, ki la shong lang ha kajuh ka bos, na Varanasi sha Ghazipur, ha ka miet jong ka 8 tarik Jylliew 2025.
Ka Ujala Yadav, ka samla pule ha ka shnong Holipur (Inamipur) kaba don ha ka thain Saidpur jong ka Ghazipur district, ka la iathuh ha ki lad pathai khubor, ba ka la iohi nyngkong ia ka Sonam, shabar jong ka steshon rel ha Varanasi bad kham hadien, ha kawei ka jaka ieng bos, ha kaba baroh arngut ki shynrang, ki la kiew ha kajuh ka bos.
Haba pynkynmaw ia ka jingshong Bus, ka Ujala ka la iathuh ba ka Sonam ka la tap ia ka khmat jongka bad ka la phong da ka t-shirt.
“Ka la shong marjan bad ka jaka shong jong nga. Ha ka jingleit, ka la kyrpad ia uwei u nongleit jingleit uba dei u shynrang uba shong hajan jong ka ban pan ia ka phone jong u ban phone ia uwei u briew, hynrei u la kyntait,” la ong ka Ujala ha ka kot khubor.
Ka la bynrap ba hadien ba uta u shynrang u la kylla jaka shong, ka Sonam ka la kynriah sha ka liang jong ka bad ka la pan ia ka phone jong ka. Ka Ujala ka la kdew ruh ba ka Sonam ka la thoh ia u nombar, nangta ka la pyndam noh shwa ban ai biang ia ka phone sha ka.
Ka Sonam ka la kyrpad ruh ïa ka ba kan kiar na ki social media bad ban kiar na kaba peit ïa ki khubor halor kane ka jingjah rngai ki shikurim haba leit honeymoon sha Meghalaya hadien ba ka la sngewthuh ba ka Ujala ka pule ïa kane ka khubor online. “Wat peit ia kiei kiei kiba khlem jingmyntoi”, la ong ka Sonam ia ka, katkum ka khubor jong ka AajTak.
Ka Ujala ka la ïathuh ruh ba ha ka jingïaid lynti baroh kawei ka Sonam ka la ïai kylli haduh katno ka bos kan poi sha Gorakhpur.
“Nga la iohi ia ka khmat jong ka tang katto katne sekhon, ha ka por ba ka la shim ia ka um na ka bilor jong nga bad ka la synreit ha ka khmat jong ka, hadien ba ka la weng noh ia ka jingsop durkhmat”, la ong ka Ujala, katkum ka khubor jong ka New Indian Express.
“Ha ka step (ha ka sngi kaba bud) haba nga la iohi ia ki TV channel, nga la iohi ia ka khubor shaphang ka tnga jong u Raja Raghuvanshi kaba la jah, ka la mih biang hadien 17 sngi ha kawei ka dhaba ha Nandganj ha ka jaka kha jong nga” la ong ka Ujala.
