Shillong, Naiwieng 09
Watla ki paidbah ka bri u Hynniewtrep ki thrang ba u bah Amazing Kurbah un iakhun ia ka ilekshon MDC ha u snem 2024, hynrei u bah Amazing Kurbah um pat kwah ban ia ai reng namar u hap ban peit ia ki para haduh hynriew ngut hadien ba ki la sah khunswet na ka jingkhlad noh ka kmie ha kine ki ar snem.
U bah Amazing u la paw namar ka jingtbit ha ka jingialap ilekshon MLA ha Sohiong constituency kat haduh ba u la shah khot ban ak kum u tyngshop lamkhmat ha ka phlim Rai-eh ka ban sa pyni paidbah ha ka 27 tarik mynta u bnai Naiwieng 2023 haduh 2 tarik Nohprah 2023 ha Khasi National Dorbar Hall Mawkhar, Shillong.
U bah Amazing Kurbah u la ioh ban ak lang bad ka puron Meda Basaiawmoit bad u Kynsai Lynshiang, bala pynbit pynbiang da u bah Kit Rina Nongrum.
Haba iakren bad u bah Amazing u la ong ba ha kine ki sngi ki paidbah ki pynpaw ba ki kwah ba un iakhun ilekshon hynrei u la kyntait namar u dei u khunswet namar u hap ban peit ia ki para.
“Nga dei u khunswet, I mei I la khlad mynta la ar snem, I pa I khlem shong shuh bad ngi ki khun, nga hap ban peit ia ki hynriew ngut ki para, takadaw nga hap ban peit lang ia ki para bad peit ia ki khun” la ong bah Amazing.