Shillong:
Ka tnga jong u IAS jong ka Gujarat, kaba la phet krad bad uwei u runar khyndai bnai mynshwa, ka la dih bih hadien ba ka la shah khang ban rung sha ka iing jong utei u ophisar ha Gandhinagar, ha ka por ba ka wanphai ha ka sngi Saitjain.
Kane ka longkmie kaba la tip kyrteng kum ka Surya Jay ka la khlad noh ha ka por ba ka dang shah sumar ha kawei ka hospital jong ka sor ha ka Sngi U Blei. Katkum ka jingïathuh jong ki Pulit, ka Jay ka dei ruh kaba shah kynnoh ha ka kam rahbor ïa ki khynnah bad ki pulit jong ka Tamil Nadu ki dang thwet ïa ka.
La iathuh ba u kurim jong ka Surya Jay, u IAS Ranjeet Kumar, uba dei u secretary jong ka Gujarat Electricity Regulatory Commission, u la bthah ia ki nongtrei katei ka iing ba kim dei ban shah ia ka ban rung shapoh iing ynda ka la poi.
Ki pulit ki la iathuh shuh shuh ba ka lah ban leit sha iing jong u lok jong ka uba la iakhlad noh ban lait na ka jingshah kem ha ki pulit jong ka Tamil Nadu ha ka jingshah rahbor jong u khynnah Madurai uba dang 14 snem ka rta. Kine ki arngut ki la shong marwei naduh u snem 2023.
La iathuh ba u Ranjeet, u la mih na iing ban pyndep ia ka dorkhas iaphet lok ha ka sngi saitjain, ha kaba ka Surya, ka la wan sha iing jongu ha Gandhinagar bad ka la pyrshang ban rung jubor. Namar bym shah shuh ban rung hapoh ka iing ka Surya ka la bam noh ia ki jingbam kiba long bih bad ka la shitom hynrei haba la kit sha hospital ka la khlad noh.
Ki pulit ki la lap ia ka jingthoh pyniap ialade kaba la thoh da ka ktien Tamil hajan ka metiap jongka, la ong u SP jong ka Gandhinagar u Ravi Teja Vasamsetty hynrei utei u heh sorkar u la kyntait ban pynpaw ia kino kino ki jingtip ba bniah.
La iathuh ba ka kyrteng jong ka Surya Jay, ka la paw ha kawei ka mukotduma, kaba iadei bad ka jingieit runar jong ka ha Maharaja High Court, bad u paralok jong u, u Senthil Kumar. La kynnoh ba ki la rahbor ia uwei u khynnah ha ka 11 tarik mynta u bnai namar ka jingiakajia pisa bad ka kmie jong u bad ki la dawa ia ka pisa kaba ar klur tyngka na ka, hynrei ki pulit ka Madurai ki la lah ban pyllait im ia utei u khynnah. Nangta ki pulit ki la sdang ban wad ia baroh kiba donkti, kynthup ia ka Surya.