Na ka jingiap briew, poi ka jingiakren iasuk ki Meitei bad Kuki ha Jiribam, Manipur
Shillong:
Katto katne ngut ki bor synshar district bad ki bor pahara ha Jiribam district jong ka Manipur ha ka sngi Palei ki la pynsuk ia ka jingialang iasuk hapdeng ki jaidbynriew Meitei bad Hmar (ki bynta jong ka kynhun Kuki-Chin-Zo).
Ha ka “ialang iasuk”, baroh ar tylli ki jaidbynriew ki la mynjur ban trei ban wanrah biang ia ka jinglong jingman bad ban iada na ki jingjia thang bad siat suloi ha ka distrik. Ki nongïalam na ki kynhun Meitei bad Hmar ki la soi ïa ka Resolution kaba mynjur ban pynlong ïa ka jingïalang ïasuk kaba la long ha ktem jong ki CRPF ha ka Elaka Cachar.
Ha kane ka jingialang laa wan iashimbynta ki heh na ki bor synchaar district, ki pulit, ki CRPF, ki pulit Assam Rifles. Ki nongmihkhmat jong kiwei pat ki jaitbynriew Kuki-Zo, kum ki jaitbynriew Paite, Thadou, bad Mizo ruh ki la iadon lang ha katei ka jingialang.
Mynta u bnai Jylliew, ka Jiribam district ka la long ka jaka ba khatduh eh ha ka jingïakynad jaidbynriew kaba dang ïai bteng ha Manipur hapdeng ki jaidbynriew Meitei na ka kshaid bad ka kynhun Kuki-Zo, ka Scheduled Tribe kaba don ha ki lum, kaba kynthup ruh ïa ka jaidbynriew Hmar.
Hadien ka jinglap ia ka met iap jong uwei u rangbah Kuki-Zo bad uwei u rangbah Meitei ha Jiribam tang hapoh katto katne taiew iwei na iwei pat, kane ka District ka la mad ia ki jingjia thang bad siat, kynthup ia ka jingshah thombor kaba la pynlong ia u pulit CRPF ban iap ha ka 14 tarik Jylliew 2019.
Shuwa u bnai Iaiong, ka distrik ka la long kaba suk bha.
Kane ka jingbthei ding kaba la sdang ha Jiribam ha ka 6 tarik Jylliew ka la pynkynriah jaka ïa palat 2000 ngut ki briew shimet na baroh ar tylli ki jaitbynriew Meitei bad Kuki-Zo-Hmar. Ki riew shimet Meitei, ki la shah pynkynriah noh sha ki jaka ai jingiarap kiba don hapoh ka sor Jiribam, katba ki dkhot jong ka Kuki-Zo-Hmar, ki la phet krad sha Assam, ha kaba la pynsah ia ki ha ki jaka ai jingiarap kiba don ha ka Cachar district.
Ha Jiribam, baroh ar jaitbynriew Meitei bad Kuki-Zo-Hmar ki dei ki jaidbynriew rit paid, ha kaba kiba kham bun ki dei ki Bengali Hindu bad ki Muslim.
Napdeng ki kynhun Kuki-Zo, ka jaidbynriew Hmar ka paw bha ha Jiribam. Hadien ka jingkulmar, ki bor pyniaid bad ki bor pahara ki la trei ban pynsuk ia ka jingiakren ia suk bad baroh ar jaitbynriew.
Ban pynthikna ia ka jingshngain jong kine ki jingiakren, la pynkynriah noh ia ki jingialang sha ka Cachar district kaba don ha ka Assam ba marjan.