Shillong, Nailar 25:
Ka lah ban dei ka sien ba nyngkong hapoh ka jylla ba ki paidbah mar shu khie naba thiah kin leit ieng lain ha jaka die tiket ha Golflink mynta ka sngi Saitjain ha ka por 7:00 baje mynstep namar ki tieng ioh ki duh tiket kumba duh ha jingialehkai quarter final kaba dang shu dep ha ka 21 tarik mynta u bnai ha JN Stadium Polo.
Watla ka jaka die tiket ha Golflink kaba don kham pajih ia ka madan Jawahalal Nehru Stadium Polo kan plie ha ka por 2:00 baje janmiet hynrei ki paidbah naduh ki shynrang bad ki longkmie ki la wan ap tiket lypa naduh 7:00 baje mynstep.
Kane ka jingiaknieh tiket ka long ban ioh kyrshan ia ka Shillong Lajong FC haba kan iakhun pyrshah ia ka North East United ha Semi final Durand Cup ha 26 tarik Nailar 2024 ha JN Stadium Polo ha Por 5:30 janmiet.
La iohi ba katba ki paidbah ki dang ienglain la bna sa kiwei pat ki dong ha sor Shillong kumta baroh ki la wan ienglain kaba la poi u lain haduh surok bah kaba la pynsahkut lut ia ki kali kiba wan na Polo sha Golflink.
Kaba phylla ka long ba kine kiba ap tiket kynthei bad shynrang ki khlem khih na u lain hapdeng ka jingther u slap uba jur namar ki tieng ioh duna jaka.
Nangta kiba ap lain ki shong shah thngan beit naduh dangstep haduh janmiet bad ieng khlem jingthait hakhmat ka jaka die tiket.
Haba la dei ka por 2:00 baje janmiet ki paidbah kim treh ban die tang ar tylli uwei u briew namar ki la ap baroh shisngi hynrei ki kwah beit ban die san tylli na bynta uwei u briew.
Kane ka jingtyrwa kiba pyniaid tiket ban die ar tylli ka dei namar ki wanrah tang shi hajar tylli hynrei haba la die san tylli ki tiket ia uwei u briew tang hapoh 10 minit ka tiket ka la lut.
Haba ka tiket ka la lut ki paidbah ki khlem khih namar ki pan beit ia ka tiket.
Haba iakren bad u nongthoh khubor ki paidbah ki la buh jingkylli shaei lut ki tiket haba ia ka tiket kaba sanspah tyngka bad laispah tyngka ki khlem die namar la wan die tang kaba arspah bad shispah tyngka.
Haba ki paidbah ki khlem khih na jaka ap tiket ki magistrate ki la phah wanrah biang sa sanspah tylli bad hangne ka la pynlong ia kawei ka kynthei samla ban kyllon ha jaka die tiket namar la iaknieh bad ki shynrang kat haduh ba ki pulit ki la tan noh sha jaka ba kham kylluid.
Watla ka tiket ka la lut kloi hynrei haduh san baje la iohi ba ki paidbah kiba dang shong hajrong ki siej kiba la pra namar ki dang sahnud namar bym ioh tiket shuh namar ki la sngewthuh ba kin sa duh ban peit ia ka jingialehkai ka Shillong Lajong bad ka North East United la 26 tarik mynta u bnai ha Polo.
Kumjuh ruh kane ka juh ka jingiaknieh tiket ka la bteng ruh ha Khyndailad.