Shillong:
Ki lai ngut ki shynrang kiba donkti ban pyniap ia u Raja Raghuvanshi ki la sah tang kumba 100 meter eiei antad na jaka sah ka Sonam bad u Raja haba ki leit sah ha Nongriat mynha ka 22 tarik Jymmang 2025.
Kine ki lai ngut ki shynrang ki long u Vishal Chauhan, Akash Rajput bad Anand Kurmi ki la leit sah ha Serene Homestay katba ka Sonam Raghuvanshi bad u Raja ki la sahlang ha ka juh ka kamra ha Shipara Homestay kaba don ha Nongriat.
Haba u nonglum khubor u la poi sha Nongriat la iohi ba kine ki ar tylli ki jaka sah ki don mar shiliang ka jingkieng jri kaba hapoh ka don ka wah kaba ki nongjngohkai pyrthei ki wanpeit ia ka jingkieng jri bad sum artad.
Ban poi sha ka Shipara Homestay hap jam ia ka jingkiengjri bad ka Serene Homestay pat ka dei kaba don ha nongriat tangba ka dei ka lad ban iaid kjat sha Tyrna.
Haba u nonglum khubor u la poi sha Shipara Homestay u trai bah Constantine Rnga u la ialam ha jaka sah ka Sonam bad u Raja Raghuvanshi kiba la sah hajrong ha ka number kaba saw kaba don tang kawei ka kamra thiah kawei ka shuki bad kawei ka miet.
Ha kane ka jaka sah jong kine ki shikurim ka long shisha kaba shit namar ka dei ka kamra kaba rit bad kaba la ker da ka kynroh dewbilat kumta hap ban plie beit da ka pyngkha ban kham pyngngad.
Katba ka jaka sah kine ki lai ngut ki shynrang ka kham bun mala kaba iohi ruh pyrshah ia ka Shipara Homestay hynrei la shu pyniakhlad ka wah kaba don ka jingkiengjri.
Kane ka jinghiar u nonglum khubor sha Nongriat ka dei hadien ba ka Sonam Raghuvanshi bad kine ki lai ngut kiba la shah kem ba ki la phla ha ki pulit ba ki la thmu ban pyniap ia u Raja sha Nongriat tangba ki la kynrandien noh namar kam long kaba shngain ia ki.
Kumta kine ki lai ngut ki la mih lang ha ka juh ka porn a ki jaka sah kumba mih ka Sonam bad u Raja ha ka por 5:30 mynstep jong ka 23 tarik Jymmang ban kiew sha Mawlakhiat.
Ki pulit ki la iathuh ba kine ki briew bad ka Sonam ki la ioh ban pyniap ia u Raja Raghuvanshi ynda la poi ha Weisawdong kaba kham kynjah bad bret sha ka riat.
