Shillong 16 Jymmang:
Ka seng ki nonghikai Ad-hoc ka kwah ban pynpaw paidbah halor ki jingeh kiba ki ia kynduh mynta, kaba dei halor ka jingsahkut bad jingbymsuidniew jong ka Sorkar Jylla ia ki nonghikai kiba trei haka kyrdan Ad-hoc.
Ka Seng ka pynsngew ba haduh mynta, la slem bha naduh ba ka jylla ka la ioh ia la ka jong ka sorkar hynrei haduh mynta ruh, ka skul kum ka Mibonpara U.P School, kaba la seng naduh u snem 1953 ha South Garo Hills District, ka dang iaineh kum ka Ad-hoc skul khlem da pynkiew ia ka jingsiew ne pynrung ha ki kyrdan jingsiew sorkar watla ki Nonghikai ki la iai trei da ki phew snem.
Ki Nonghikai Ad-hoc mynta ki ioh tang 22,000/- (Arphew Ar Hajar) tyngka shi bnai kaba ym biang satia bad ka khlem iahap ruh bad ka dor jong ka por kaba mynta. Kane ka long ka jingkhniot bein ia ka jingim jong ki Nonghikai kiba trei shitom naka bynta ban kyntiew ia ka pule puthi jong ka jylla.
Ka seng ka pynpaw ruh ba ki Nonghikai Ad-hoc ki long kiba kohnguh, kiba iaishah haka kam naka bynta ka jingbit jingbiang jong ki khynnah skul bad ka jylla hi baroh kawei.
Ka seng ka la iaishah ruh khamtam ha kaba ka Sorkar kala shaniah ha ka State Education Commission ban pynbeit ia ka kam ha kaba iadei bad ki jingsiew tulop bad kyrdan kam jong ki Nonghikai.
Naka liang jong ka Seng ka la kyrpad ia ki nongmihkhmat ba kynthup ia u Myntri Rangbah jong ka Jylla, u Myntri ka pule puthi bad kiwei ki riewlum Sorkar ban sngewthuh bad shim khia ia kane ka kam ba kongsan, bad ban ai ia ka hok jong ki Nonghikai Ad-hoc ia ka jingsiew kaba ki dei hok ban ioh bad ka kyrdan ka ba biang.
Kumta ka Seng kan pynlong ruh ia ka jingialang jong baroh ki Nonghikai Ad-hoc ha ka jylla ha ki sngi ban wan ban shim ia ka rai kaba shai bad kaba biang lada ka Sorkar Jylla kam shim khia ei ei nalor ba ngi la phah shithi la bun bun sien.
Ha kajuh ka por ki Nongialam kin nang iai mih sha ki bor ban pynsngew ia kine ki jingeh kiba ki Nonghikai ki shem bad ia kynduh.
