Shillong, Nohprah 29:
Ka KSU Laban Circle ha ka janmiet jong u 28 tarik u Nohprah, 2023 ka la leit kyndang ia kawei ka Shelter Home kaba don ha Kenches Trace (Harrison Bridge) hadien ba la saphriang ka video ha ki social media ba bun ngut ki briew ki ju iadih bad iadie droks ha kane ka shelter home bad kane ka shelter home ka la long kum ka ktem droks.
La ioh jingtip ruh ba kane ka shelter home ka dei ka jaka ban leh kam awria bad ka long lyngkar haduh katta katta ba ym don ba peit ba khmih ia kane ka jaka na ki bor pyniaid jong ka Shillong Municipal Board.
Marsien ioh jingtip halor kane ka jaka, ki dkhot jong ka Circle bad ha ka jingsynran jong ki pulit jong ka Laban Police Station ki la hiar jurip, bad la lap ia ki injection (syringe) bad ki kyndok buh droks hynrei ki briew kiba iadih iadie droks kim shim ladon shuh ha kane ka jaka. La ioh kyrteng jong kine ki briew kynthei bad shynrang kiba ju mlien ia kane ka kam bad la aiti noh sha ka pulit ka Laban P.S ban leh ia kaba donkam.
Ka Seng ha kine ki sngi kan leit buh dorkhas sha u CEO ka Shillong Municipal Board ba dei ban buh noh ki bor pahara (Security Gaurd) ha kane ka jaka bad ban dei ban pynmih noh mar mar ia kine ki briew kiba don kti ha kum kine ki jait kam bad nangne shakhmat ba shuwa ban ai jaka sah ia kino kino ki briew, dei ban da jurip bniah shuwa.