Shillong, Nailur 04:
Ka kmie jong u Steve Jyrwa ka kong Bibi Jyrwa ka la iathuh ba wat ka puron jong ki phlim hindi ka Karishma Kapoor ka la shoh biej haba ka la iohi ba ki sem da ka dhara haba ki leit sha Mumbai ban sakhilang haba u khun jong ki u Steve Jyrwa u poi mynta ha ka top-6 ha jingiakop shad india Best Dancer kaba saw ba la pyniaid da ka SonyTv.
Haba iakren kyrpang bad ka kmie jong u Steve Jyrwa ka kong Bibi Jyrwa bad ka meiieid kong Sita Jyrwa ki la pyntip ba lada u Steve Jyrwa u shah jied sha ka final ki la pynkhreh ban rah da ka dhara ban ai sngewbha ia ka Karishma Kapoor kaba dei ka nongbishar.
Kumta ki la kyrpad ia ki paidbah ban poi sha ka final donkam tang ka jingkyrshanlang baroh da kaba nion da ka vote bad kin sa pyntip pat ynda la ioh ia u number.
U Steve Jyrwa u dang 17 snem ka rta u dei u khun ba ar jong ka kong Bibi Jyrwa uba sah ha Nongmensong, Shillong u dei u khun bym don kpa shuh ka kmie ka hap bylla die jain ban shong madan ha khyndailad ban bsa ia saw ngut ki khun.
Namar u kpa jong u steve u la khlad noh, la shimti noh ka meiieid naduh dangrit bad haduh mynta wat na Mumbai ruh ki ithuh ia ka meiieid ka kong Sita Jyrwa namar u Steve u kham ieid ia ka meiieid namar la sumar naduh dangrit.
Ka meieid jong u Steve ka kong Sita ka la iathuh ba namar u don jingshitom ha ka met ka la phah sumar kylleng ki jaka hynrei khlem iadei kumta ka la rai ban phah noh ban hikai shad ha kawei ka jaka ha Polo ha ka por ba u dang dap 9 snem.
“Hadien ba u la sdang hikai shad ki la sdang biang ki kjat hynrei namar u nonghikai shad um da thikna nga la phah hikai shad ha Nongmensong ba la hikai da ka Zarina Jyrwa kat haduh ba un poi shaduh ka top-6 haduh Mumbai” ka la ong
Ka kong Sita ka la sngewsarong ban sem dhara haba ka poi ha Mumbai khamtam lei haba ioh kiew sha rynsan kaba u khun u don mynta ha jaka iakop shad.
Ka don jingkyrmen ba u khunksiew un poi sha final da ka jingkyrshan ki paidbah ka jylla.