Shillong, Nailar 14:
Ka jingieid ki paidbah ia ka jingialehkai phutbol ha Shillong ka la pynlong ia u rangialehkai shadien jong ka Shillong Lajong FC u samla Kenstar Kharshong ban phla ba lada u la thait haba ialehkai ha madan hynrei mar shu hylla ki nongkyrshan u la ioh mynsiem biang ban beh ia ka bol.
U Kenstar Kharshong uba dang 25 snem ka rta uba shong ba sah ha Diengpasoh, New Shillong u dei u rangialehkai uba la ioh ban thep ia ka kol kaba ar na ka Shillong Lajong FC ha ka minit kaba 48 ha ka jingialehkai Durand Cup pyrshah ia ka Rangdajied United FC kaba la long mynha ka 10 tarik mynta u bnai ha JN Stadium, Polo, Shillong.
Ban pynthikna ba ka Shillong Lajong kan lah ban pynliem ia ka FC Goa ha ka 17 tarik mynta u bnai ha ka por 7 baje janmiet ha JN Stadium, Polo, la sngewthuh ba ka donkam ruh ia ki nongkyrshan ban leit ai mynsiem ha madan khnang ba ki rangialehkai kin lah ban lehkai bha khnang ban ioh rung sha ka final round.
Ha ka jingiakynduh, u Kenstar u la pynpaw ka jingsngewkmen haba u la ioh ban thep ia ka kol kaba ar da kaba pyndei da ka khlieh haba ai bol u paralok haba kynjat na kyndong.
U la phla ba ka jingioh penalty ka Rangdajied ka dei ka jingbakla jong u ban pyndei haba u rangialehkai rangdajied u la kyllon hapoh u lain.
“Nga la kyiuh haba ioh penalty namar ngim tip ioh ka kylla ka jingialehkai hynrei namar bym rung ngi la ioh mynsiem bad mar kumta haba ioh corner u coach u la phah ia nga ban leit sha ka kol ka rangdajied bad hangne nga la ioh ban thep ia ka kol” u la iathuh da ka jingkmen.
U don jingkyrmen ba lada bun ki paidbah kiba wan kyrshan ha madan Polo, ka Shillong Lajong kan ioh mynsiem ban jop ia ka FC Goa khnang ban ioh ban rung sha ka final round.
U la iathuh haba u leit ialehkai shabar ka jylla ki duna bha ki paidbah ban wan peitkai ha madan hynrei lada ialehkai ha Shillong ki bun bha ki paidbah kiba wan peitkai.