Ka Synjuk Rangbah shnong Ribhoi hapoh ka jingialamu bah BB Makdoh kum u Chairman ki la leit ïakynduh ia u Myntri ka tnad pynroi nongkyndong u AT Mondol ha jaka treikam ha Secretariat ban kyrpad ban pyllait noh ia ka pisa bai tiar kaba la sahkut mynta la lai snem ha ka skhim MGNREGS.
U bah Makdoh u la ong ba ka jingsahkut ka bai tiar la palat lai snem ka la pynsahkut ia ki skhim MGNREGS ha ki shnong ki thaw namar ki nongkyrshan bai tiar kim treh shuh ban ai tiar haba ka pisa kaba rim kim shym la ioh.
Shuh shuh u la ong ba ha kine ki lai snem ka sorkar ka pyllait ia ka bai tiar kumba 30 percent na ka 100 percent kaba la buh jingeh ia ki shnong ba kin pynïaid sted ia kane ka skhim.U bah Makdoh u la pyntip ba wat ka bai bylla sngi ki job card ruh ka sorkar kam shym la pat pyllait mynta la lai bnai kane leit ka la buh jingeh ia ki nongbylla sngi.
U la pynpaw ba u Mondal u la lyngngoh haba u ioh jingtip ba ka Ribhoi ka ioh duna bha ka bai tiar haba phah pisa na ka sorkar jylla.Kumta u la kyntu ia u Mondal ba dei ban ailad ia ki trai kiba don par maw par shyiap ba kin plie namar haduh mynta ka sorkar ka ai laisen tang ha killing, Umsnign bad umroi kaba buh jingeh ia ki paidbah ban leit thied tang shi trok ar trok haduh Killing haba ki donkam banshna iing.
U la ong ba lada ailad ia ki trai jaka ban die ia ki shyiap ki maw ka long kumba aikam ia ki samla khlem kam khlem jam.