Hadien ba ka jingjia shah tynrah thuk thuk jong kawei ka longkmie ha surok Mawlai ha uwei u khynnah uba dang 17 snem ka rta kaba la mih ruh ka jingkynnoh leh thurmur ïa ka ophis jong u District Transport Officer DTO jong ka East Khasi Hills ba u ai ïa ka learner driving licence wat la um pat kynjoh ïa ka 18 snem ka rta, mynta ka sngi na ka liang u DTO jong ka East Khasi Hills ha ka jingïakren bad ki katto katne ki lad pathai khubor u la ïathuh ba ka jingai ïa ka learner driving license jong ka ophis ka dei kaba shong aiñ kat kum ki kyndon jong ka Motor Vehicle Act.
U la ong ba kat kum ka section 4 jong ka Motor Vehicle Act ka shah ia uno uno ban ïoh ia ka drving licence hynrei kim lah pat ban niah ïa ki ar shaka kiba palat ia ka 50 CC bad kim dei satia ban don gear bad ong ba ki kmie ki kpa ruh ha ka por ba dei ban ai ia ka driving licence ki dei ban mynjur lang ki kmie ki kpa ban kit Khlieh ïa ki khun ki kti jong ki kiba applai ïa ka driving licence.
Haba kylli, u la ïathuh ba ban pyntreikam pat ïa kane kyndon ba uno uno u ba niah ia ka kali kan dei kat kum ka jingpruidak ka act ka dei ka bynta kita ki law enforcing agency ne ki pulit traffic.
U la ong ruh ba kat kum na kaei kaba la mih ha ki lad pathai khubor ki ïathuh ba une u khynnah uba tynrah ïa kane ka longkmie haduh ba kan da khlad u dei uba la ïoh ia ka Learner driving licence bad ong ba kat kum ki kyndon ruh ba uno uno u ba niah ïa ki kali ne thuk thuk ruh kim lah ban niah marwei hynrei ryngkat lang bad uta uba don ia ka valid driving licence bad ong ba kat kum ka jingïohi na ka jingïakren ha ki lad pathai khubor une u khynnah u don tang marwei bad ong ba kane ruh ka la dei ka jingpynkheiñ ïa ka kyndon.
Haba kylli u la ïathuh ba ka dei beit ka bynta ki pulit ban pynthikna ba kito kiba ïoh ia ka Learner driving licence kin shong bad kiba la nang ban niah kiba don ruh ka licence ryngkat ka jingthoh kaba ïohi shai ha ka kali ne ka ar shaka kaba ki niah ïa u dak ‘L’.