Shillong:
Ki shipai India haba ki la sdang ïa ka Operation Keller ba la jer kyrteng na ka jaka ïakynduh ki la ioh ban pyniap haduh lai ngut ki lehnoh Lashkar hadien ba ki la ïoh ïa ki “jingtip ba kyrpang” na ka kynhun shipai jong ka Rashtriya Rifles.
Napdeng kitei ki lai ngut, kitei ki arngut ki lehnoh kiba la shah pyniap ki dei kiba la tip kyrteng kum u Shahid Kuttay bad u Adnan Shafi, baroh arngut ki dei ki nongshong shnong jong ka Shopian.
Katkum ka jingpyllait khubor, la ioh kurup lai tylli ki suloi AK-47 bad ki tiar siat na ki lehnoh.
La pyni ia ki poster ‘Terror Free Kashmir’ jong ki lai ngut ki lehnoh ba la kyrshan da ka Pakistan
Ym duna ia ka lai ngut ki lehnoh Lashkar-e-Taiba ki la shah pyniap ha ka thain Zinpather Keller jong ka Shopian ha ka 13 tarik Jymmang hadien ba ka la mih ka jingiakynad bad ki bor pahara.
U Kuttay, uba la pyniasoh bad ka Lashkar ha u snem 2023, ula donkti ha ka jingleit siat ha ka jaka jngohkai pyrthei ha Danish Ressorth ha ka 8tarik Iaiong 2024, ha kaba arngut ki nongjngohkai pyrthei na Germany bad uwei u nongniah kali, ki la mynsaw. U la donkti ruh ban pyniap ia uwei u Sarpanch ka BJP ha Heerpora ha Shopian ha u bnai Jymmang jong u snem ba la dep, ong ka khubor ba la iohlum.
U Shafi, uba la rung sha katei ka kynhun lehnoh, ha u snem 2024, ula donkti ha kaba pyniap ia u nongbylla bym dei trai shnong, ha Wachi ha Shopian, la bynrap shuh shuh ki tyllong khubor. Ia ka jinglong jong u lehnoh uba dang sah ym pat lah ban pynthikna.
“Ha ka por ba pynlong ia ka jingkhynra, ki lehnoh ki la siat mar kylliang bad ka la mih ka jingiakhun kaba jur bha, kaba la pynlong ia ka jingpyniap ia lai ngut ki lehnoh ba shyrkhei,” la thoh ka Army ha ka X, da kaba bynrap ba ka jingkhynra ka dang iaid shakhmat.
La iathuh ba Lai tylli ki suloi AK-47 ryngkat kiwei pat ki tiar siat bad ki tiar siat la ioh kurup na ki lehnoh kiba la shah pyniap ha Shopian.
Ha kawei pat ka jingpynbna, ki tnat pahara ki la buh ïa ki poster ‘Terror Free Kashmir’ jong ki lai ngut ki lehnoh ba la kyrshan da ka Pakistan — u Adil Hussain Thoker, u Ali Bhai bad u Hashim Musa — kiba la ngeit ba ki dei kiba donkti ha ka jingshah thombor ha Pahalgam ha ka 22 tarik u Risaw.
Ia ki poster la buh ha ki katto katne ki jaka ha kylleng ka Elaka Shopian. La pynbna ia ka khusnam kaba T.20 lak ia kino kino kiba ioh ia kino kino ki jingtip kiba lah ban ngeit.
Tang katto katne sngi hadien ka jingshah thombor ha Pahalgam, ki bor synshar ka Jammu and Kashmir ki la pynbthei ia ka iing sah jong u Thoker ha Bijbehara ha ka 25 tarik Risaw da kaba pyndonkam da ki bom IED. La ngeit ba u Thoker u la don ka bynta kaba kongsan ha kaba ïarap ïa ki lehnoh Pakistan ban pynlong ïa kane ka jinghiar thma ha ka kshaid Baisaran kaba itynnad bha.
U Thoker u la jam ïa u pud Attari-Wagah sha Pakistan ha u snem 2018 shwa ba un rung biang sha ka Valley ha u snem ba la dep.
