Shillong, Lber 22 :
Kawei ka kali bolero pickup ha ka step jong ka sngi Thohdieng ka 22 tarik Lber 2024 kaba kit synsar ka la kylla bad thiah lyndang hapdeng surok ha Lad Lummawbah, ha kaba u nongñiah jong katei ka kali u la mynsaw bad la pynkit noh sha Civil Hospital Shillong ban ïoh ka jingsumar.
Kane ka kali pickup kaba don ïa u registration number ML 05 T 3488 kaba wan na ka thaiñ Upper Shillong kaba thmu ban leit buh ïa u synsar sha Mawiong bad namar ka jingkit palat pud u nongñiah um shym la lah shuh ban teh lakam ha kaba ka kali ka la kylla noh hamar ba poi ha u khongwaiñ Lad Lummawbah.
Hadien katto katne kynta, ïa kane ka kali la wan ban tan noh da ki kali khwai lyngba ka jingïarap lang ki pulit pynïaid kali kiba la sei noh ïa ki synsar napoh ka kali, kaba ki kali khwai ki la ïoh ban tan da kaba suk.