Shillong, Naiwieng 22:
Ka tnat ka koit ka khiah jong ka Sorkar kala kular ban kyntiew ïa ka bai nong ki ASHA da kaba pyntreikam da ka skhim Community-Health Incentive ban kyntiew ïa ki jait jingsiew.
Ïa kane la pynbna da ka Myntri ka tnat ka koit ka khiah ka Kong Ampareen Lyngdoh hadien bala wai ka jingialang bad ka Meghalaya ASHA Workers Union (MAWU) ha ka sngi Balang ka 22 tarik Naiwieng 2023.Ka kong Kong Ampareen haba kren sha ki lad pathai khubor kala ïathuh ba ki ASHA kin sa ïoh kham bun ïa ka bai nong lyngba ka Community Health Incentive, bad lyngba kane ka skhim ki ASHA kin ïoh shibun ki jingïarap kynthup ka jingsiew lada ki leit pynpoi ïa ki longkmie ba armet sha ki jaka sumar, ka jinglut, ka bai kali, lada ki rah ïa ki nong pang sha ki jaka sumar, band ruh ban ai buskit ïa ki ASHA kiba wanrah ka jingduna ka jingkhlad ki khunlung bad longkmie.
Kala ong ba haka jingïalang la mynjur ban thaw da ki Committee ha ka jingdonlang ki Village Health Council lane ki Dorbar Shnong, ki ophisar na ka Sorkar Jylla, ki ophisar na ka tnat National Health Mission (NHM) bad ki ASHA.
Ka la ïathuh ruh ba namar ba la rai ban kyntiew ïa ki jait jingsiew sha ki ASHA, ka tnat NHM kaba ju siew 22 klur kan dang ïai siew hi 22 klur bad ka Sorkar Jylla kaba ju bei 17 klur kan pynlut noh 26 klur.
Nalor kane ka Myntri ka tnat ka koit ka khiah kala pynbna ba ki Committee ki ban don ha man ki District kin bishar bniah halor ka jingdkhoh ka rukom siew īa ka bai nong sha ki ASHA ha baroh kawei ka Jylla da kaba ong ba kiba bun ki ASHA kim ïoh ïa ka jingsiew ba ka pisa kam ju poi ha ki bank account jong ki.