Shillong:
U Kajal Roy u councilor Hindu uba na Rangpur, u la don lang napdeng ki 100 ngut ki briew kiba la iap ha ki jingiakhih ba shyrkhei ha kylleng ka Bangladesh ha ka Sngi U Blei. Ki khubor na India bad Bangladesh ki iathuh ba la thombor ia ki iing bad ki temple jong ki Hindu, kynthup ia ki temple ISKCON bad Kali, ha kaba la pynbor ia ki nongmane ban wad jaka rieh.
Da ki hajar ngut ki nongïakhih na Bangladesh kiba dawa ïa ka Myntri Rangbahduh ka Sheikh Hasina ban risaiñ, ki la ïakynad bad ki nongkyrshan jong ka sorkar ha ka Sngi U Blei ha kawei na ki sngi kaba ïap briew tam naduh ba la sdang ki jingïakhih.
Ka pakhang shnong ka la treikam naduh ka por 6 baje janmiet jong ka Sngi U Blei bad kan dang bteng. Ka jingkhang khyrdep lai sngi ia baroh ki jaka treikam, kynthup ia ki bank, la pynbna da ka sorkar. Hynrei ki jingshakri kiba donkam kum ki hospital, ka um, ka gas, bad ka bording kin dang iai bteng khlem jingthut khlem kut.
U heh shipai u la pynthikna ba ka jinglong jingman kan sa wanphai biang hapoh ar sngi. La kham iohi ia ki shipai ba ki siat blank ha suinbneng ban pynpra ia ki paidbah, namar ba ki la byrngem ha ka sngi Saitjain ba kin ym siat kuli ei ei. Ki shipai kim shym la siat ia ki nongiakhih hynrei ki la siat blank sha suin ban pynpra ia ki dkhot jong ka Chhatra League ha Cumilla.
“Ka la dei ka ‘Bloody Sunday’ mynta ka sngi. Ki nongleh bymman ki la pynkylla ia ka jingleh donbor kum ka jaitbynriew. Ki Social Media kum ka Facebook, Twitter, bad Youtube ki la shah khanglad”, la ong u Professor Nazmul Ahsan Kalimullah, uba dei u nongthoh sain pyrthei na Bangladesh ha kane ka kotkhubor.
Ka PM Hasina ka la pynmih ia ka jingmaham kaba tyngeh ia ki nongiakhih kiba i kumba kim kohnguh. Ha ka jingjia, u para jong ka Hasina, u Sheikh Sohel, u la thang ia ka iing jong u da ki nongiakhih. Nalor kata la pynjulor ruh ïa u mot jong u Sheikh Mujibur Rehman da ki paidbhur kiba la bitar ha ka thaiñ Rajbari. Ka ophis jong ka Beximco House, kaba dei ka kompeni shna dawai kaba heh ruh, ka la shah thang.
“Kine ki jait jingiakhih kim pat ju jia mynno mynno ruh ha Dhaka; ka seng pyrshah ka lah ban shah kyrshan ha ka bor kaba heh kaba jngai na ka dewbah kaba la ju pyrshah ia ka sorkar kaba mynta. Ki don bun jait ki jingiathuhkhana kiba iaid beit, hynrei kaei kaba uwei u donkam ban pyrkhat in ka long ba ka sorkar, da lade, kan ym kwah ba ka jingkulmar kan dang bteng kumba ka iaid pyrshah ia ki Ki por kim thikna, bad lah ban kyrmen tang ba ka jingsuk kan don,” ong ka tyllong khubor na Bangladesh.
Katba ki nongïalam ki samla pule ki dang kyntu ïa ki samla pule na kylleng ka ri ban ïaid paidbah sha Dhaka ha ka sngi Nyngkong, kaba kham kloi shisngi ban ïa kaba la buh por tynrai.
“Ngi kwah ba ki samla pule kin ker kut ia ka lawei na ka bynta ka Bangladesh, ka jingkylla ka la sdang lypa,” la ong ka Pinaki Bhattacharya, kawei ka nongialeh pyrshah na Bangladesh.
Ha ka juh ka pork a sorkar India ka la bthah ia baroh ki nong India kiba sah ha Bangladesh ba kim dei ban mih na iing katba dang jur ka jingiakhih.
