Ki pulit ki talasi kynsan kynsan haba thep 5 ngut long kumba hiar thma ia ngi, ong ki draibar

Ka Synjuk ki nongniah taxi sor bad khapsor ka la leit ban buh da ka jingthoh ban kyrpad ia ka Deputy Commissioner, East Khasi Hills District, u Superintendent of Police traffic bad ia u District Transport Ofifcer, East Khasi Hills Shillong ba kin weng noh ia ka jingphah khynra ia ki local taxi da kaba kynnoh ba thep bun briew palat.
Haba iakren bad u bah Pynsuk Youroi uba dei u General secrerary ka Synjuk u la ong ba ki pulit pynïaid kali bad ki nongniah local taxi ki long kum u tom and jerry namar shiphang ki ia dom shiphang ki iatreilang na ka bynta ka jingbit jingbiang haba pynkylluid ia ka sor Shillong.
U la ong ba ka jingkhynra kynsan kynsan ki pulit ia kajingthep briew ki local taxi ha shillong ka long kumba riam ia ki haba ki dang kamai ki la shah pynhiar bad shah dainkuna ruh.
U la ong barabor ki ju thep 3 ngut shadien bad uwei shakhmat hynrei don ki por ba hap thep saw ngut lada ki wan shiba haiing ne shiparalok khamtam lei kiba kamai sha khapsor.