Shillong, Jymmang 25:
U President ka National People’s Youth Front (NPYF) bah Kitborlang Nongrem kaba dei ka tnad treikam jong ki samla ka NPP ha Meghalaya u la ong ba u Deputy Commissioner ka East Khasi Hills District uba dei ruh u Returning Officer ka Shillong constituency ha kane ka ilekshon MP Lok Sabha u sngewthuh ma u haba u shong ha ka shuki ban wanrah jingsuk ha nongbah Shillong.
Kane ka jingpynpaw ka jong u bah Kitborlang ka dei hadien ba ki nongialam ka Voice of the People Party ki la mih ban pynpaw ka jingpyrshah ia ka rai u DC ban nym shah ban mih bun briew ha ka sngi niew vote ha ka 4 tarik Jylliew 2024.
U bah Kitborlang u la ong ba kita kiba shong ha ka shuki ki kham sngewthuh ban pyniaid ia ka kam namar ka Shillong ka dei ka nongbah jong ka jylla kan sa don ka jingthut ha ka shongsuk shongsain lada wan bun briew ha ka sngi niew vote.
U la ong ba kumno yn khang ia ka jingbun briew ha Mawkyrwat ne Nongpoh kaba la sngewthuh ban nym ktah ia ka suk ka sain jong ki paidbah hynrei u DC ka East Khasi hills district u sngewthuh ba lada shah ban mih paidbah ka jingbun briew kan ktah ia ka iaid ka ieng ha Shillong.
“Ngim tip mano ban jop ne mano ban rem ha ka 4 tarik Jylliew 2024, hynrei ngi hap ban peit ruh ia ka shongsuk shongsain hapoh ka sor Shillong” u la ong.
U la ong baroh ki kyrtong ryngkat ki nongkitkam ki seng sainpyrthei bapher bapher ki la dep pynshai sha ki paidbah bad ki paidbah ki la dep ai ia ka rai ha ka 19 tarik Iaiong 2024.
“Kum ki nongiakhun ia ka ilekshon ngi hap ban pdiang ia ka jop bad ka rem namar haba ngi don ha seng Congress ngi jop haba ngi rung ha NPP ngi rem” u la ong.
Kumban shu pynkynmaw ki nongialam ka VPP hapoh ka jingialam u bah Brighstarwell Marbaniang u MLA ka Mawlai ki la leit iakynduh ia u DC ha ka sngi Thohdieng ban pynpaw ka jingpyrshah haba ym shah ban mih paidbah ha ka sngi niew vote kumta kine ki nongialam ki kwah ba dei ban shah paidbah haba leit niew vote ha ka 4 tarik Jylliew 2024.