Shillong, Naiwieng 01
Ka Synjuk Rangbah Shnong Ribhoi hapoh ka jingialam u bah BB Makdoh kum u Chairman ka la leit ïakynduh ia u Myntri ka tnad Revenue jong ka sorkar jylla bah Kyrmen Shylla ban dawa ba dei ban pynhiar dor noh ia ka bai pynrung kyrteng (register) ia ki jaka namar ka jingrem palat ka la pynlong ia ki briew kiba sah ha khappud ban leit pynrung kyrteng ia ki jaka sha Assam.Haba iakren bad u bah BB Makdoh u la iathuh ba ki paidbah ki ïakynduh jingeh ban shim ram na bank namar kim pat pdiang ia ka bai pynrung kyrteng ne register ha Khasi Hills Autonomous District Council (KHADC) lada ki kmie ki kpa kishim ram ban phah pule ki khun ne shna iing hynrei ki bank ki shim beit ia kaba la register na ka sorkar.U la iathuh ba ka bai register jaka ha ka sorkar ka long 150 tyngka shi square feet hajan surok bah National Highway katba sha kham kyndong ka kham duna.U la ban biang ia u Myntri ka sorkar ba dei ban nym phah siew pisa ia kiba sah ha khappud haba pynrung kyrteng namar kiba sah ha khappud ki leit sha Assam namar kim ioh ei.Ha ka juh ka por u la pyntip ba u la leit ïakynduh ia u bah Paul Lyngdoh, Myntri ka tnad social welfare ban kyrpad ban pynkha Anganwadi centre sa ha kito ki shnong kiba la palat 200 ngut ki khynnah namar haduh mynta ki don palat 30 tylli ki shnong.U bah Paul Lyngdoh u la kular ban phah wad jingkheiñ ia ki shnong kiba la donkam ban shna ia ki iing ban sam shana ia ki khynnah.