Shillong 10 Iaiong:
Ki paidbah nongshong shnong jong ka Mawkynrew bad ka Mawleiñ ha ka sngi palei ka 10 Tarik u Iaiong 2025, ki la leit sha Madanrting Police Station, halor ka jingshah khot hajir ia ki 10 ngut ki nong shong shnong, ba kynthup ia ki 8 ngut ki rangbah bad arngut ki longkmie.
Ka jingshah khot hajir kitei ki 10 ngut ki nongshong shnong ka Mawkynrew bad Mawleiñ, kadei halor ka jingjia ka ba la jia myn ha ka 20 Tarik u Kyllalyngkot 2025, ka ba ladep lai bnai mynta, ha ka ba kitei ki artylli ki shnong ki la leit tur sha Umjar, ban pyrshah bad pynsangeh ia ka jingpyntrei ia ka skul ram krishna mission kaba la tei khlem ioh jingbit na ka shnong da kaba kynnoh bad u acting sordar ba mynta u la ai ia ka tei ka jaka khlem pyntip sha ki nongshong shnong jong ki ar shnong.
Ka jingleit tur kitei ki artylli ki shnong sha katei ka jaka ba shna ia ka ram krishna, ka ba la mih ka jingiakulmar bad ia ktah kti hapdeng ki nongshong shnong bad ki pulit. Kumta na ka liang ki Pulit ka Madanrting Police Station mynta ka sngi ki la khot hajir ia kitei ki 10 ngut.
Ha kane ka sngi shah khot hajir ki pulit ki la wan ban khot ia ki kyrteng ban phah rung iwei hadien iwei pat, hynrei ki paidbah kim Shah da kaba ong, ba ngi don lut hangne ngin runglang beit baroh shapoh.
Kumta hadien ba ki paidbah jong kitei ki artylli ki shnong ki la pyneh triang ban rung beit baroh 10 ngut ha kajuh kapor, ki bor pulit ki la Shah ia ki ban rung baroh shapoh ban tian bishar.
Ha ka jingiakren bad ki lad pathai khubor hadien ba la dep mih na police station na ka liang u bah Phrangstarwel Wankhar u la ong, ba ki pulit ki la pynngat shibun ki kyndon pyrshah ia ki, hynrei ula ong, ba lada ki pynngat shispah tylli ruh Ngim tieng ia ka jingshisha.
U la ong, ba ki Pulit ki la kylli ha kaba iadei bad katei ka jingjia ha Umjar ka ba ki la leit tur ban pyrshah ia ka jingshna ia ka Rama Krishna Mission khlem da ioh jingbit na ka shnong, bad ki kylli ba balei ki leit ban pynkulmar ha katei ka sngi, ha kaba u la iathuh, ba mano ba pynkulmar nyngkong.
Katkum ka jingiathuh ki Pulit ba ki ba mudui ejahar pyrshah ia ki kadei beit na ka liang pyrshah, bad ka smgewthuh ba dei beit u acting Sordar ryngkat ki nongbud jongu.
U bah Phrangstarwel Wankhar ula ong ruh, ba lada ki pulit kin khot biang ban iakren ia ka juh ka mad ngin nym wan shuh namar kam myntoi haba ki la wan ban pynshai lut baroh mynta ka sngi.
Nalor kata u la ong, ba ha ka Mukotduma ba la mudui pyrshah ia u la kdew, ba ma u ruh u la donktilang ban ai ia katei ka jaka sha ka Rama Krishna Mission, hynrei u bah Phrangstarwel ula buh ka jingkylli bad pan jingshai na u Secretary ka Rama Krishna Mission ba un ai ka jingpynshai, ba mynno u la donktilang ha kane kakam. Kumta u bah Phrangstarwel kum u nongialam jong ka sur ki paidbah, u la saitkhuit ba um shem la donkti eiei ruh.
Ha kajuh kapor u la ong, ba baroh ki nongshong shnong ki pynrem ia u Syiem namar naduh mynno ladep ban dawa ban wengnoh ia u ne u acting sordar namar lah shiphew snem mynta u lah long Kum u acting sordar bad ki ngi kwah ban ioh noh ia u sordar bapura, hynrei ka ba pyningkhong ia ki paidbah ym tang ba katei ka jaka, hynrei u Syiem ula pynmih ka jingthoh, ba ka jaka ka khyndew ka ba danghap ha mawkynrew pyllun, kynthup ia ka Mawleiñ kadei jong ki kur Mukhim bad kamdei jong ki paidbah, kane ka la nangpynsat shuh shuh ia ki paidbah namar wat ki kur Mukhim ruh kin hap thied ka khyndew ka jaka na kiwei pat ki kur, katba u Syiem u ong ba kadei jong ki Mukhim.
Lada Ki pulit ki khot shi khot hajir ban iakren ia kajuh ka mat, ngin nym wan shuh bad lada jia jia eiei, ki pulit kin hap bah khlieh hi, la ong u bah Phrangstarwel.
U la iathuh, ba Haduh mynta ia katei ka jaka ba shna ia ka Rama Krishna Mission ki dangphah trei beit.
