Shillong, Lber 26:
U Lamboklang Khongkhlad uba 36 snem ka rta uba dei u nongrwai uba la sdang paw ha kine ki sngi u la khlad noh mynha ka 25 tarik Lber 2025 ha ka por 2;00 baje nohphai sngi ha iingsah jong u ha Pynursla, East khasi Hills District namar ka jingpang kyndeh shadem ne heart attack.
U bah Lamboklang u dei u nongrwai jong ki ar tylli ki jingrwai kaba ki paidbah ki sngewtynnad ban sngap kaba la dep pyllait ha youtube channel Amos Suting.
Kine ki ar tylli ki jingrwai kaba ki paidbah ki sngewtynnad ban sngap ki long Ieid ia phi kaba la pyllait ha ka 21 tarik Nohprah 2024 kaba la poi palat 24 lak ngut kiba la dep peit bad kawei ka jingrwai kaba ai kyrteng Thapbalieh bunrong kaba la pyllait ha ka 15 tarik Naiwieng 2023.
Ki jingrwai kaba u bah Lamboklang u la dep rwai kaban sa pyllait paidbah ki don sa ar tylli kaba u la dep rwai ha studio hynrei kine ki jingrwai baroh kin sah kynmaw ha ka jaidbynriew khamtam ia ki paidbah kiba sngewtynnad ban sngap jingrwai khasi.
Ban pynthikna ia kane ka jingjia ba sngewsih, u nongsain hima u la ioh ban iakren bad u hynmen bah N. Khongkhlad uba la pyntip ba ia ka met jong u bah Lamboklang kiba haiing hasem kin sa pyndep ia ka jinglehniam ha ka 27 tarik mynta u bnai ha u lum jingtep ka Balang Katholik Pynursla.
U Bah Lamboklang u la ieh shadien ia ki hynriew ngut ki khun.
