SHILLONG, Jymmang 23:
Ka jingbym shah shuh ban iaid ia ki kali heh naduh ki bos ki trok ha jingkieng umiam namar ka jingmaramot kaba la iaid mynta la 6 bnai kynthih ka jingduhnong pat ka wan sha kiba im kamai jakpoh da kaba shong dukan bad shim bai ieng kali ha Inter State Bus Terminus Shillong kaba don ha Mawlai Mawiongrim.
Ha ka jingjurip u nonglum khubor u nongsain hima ia katei ka jaka ieng ki bos ba wan kit ia ki paidbah na kawei ka jylla ka la kynjah namar ka don satang ki bos jong ka MTC bad tang kawei ka bos ba wan na Arunachal Pradesh kaba iaid na Mawryngkneng katba kiwei ki bos ki la wan buh bad shaw ia kiba shong kali hakhmat ka Umiam Police Station kaba don hajan ka Lad Umroi namar bym shah shuh ban kiew sha shillong haba dang iaid ka jingmaramot ia ka jingkieng umiam.
Ha kane ka jingjurip la iohi palat 18 tylli ki dukan sha, ki dukan die tiar shu thain, ka dukan die dawai bad restaurant ki la khang lut namar bym don briew shuh ban dihsha ne bamja.
La iohi ruh ia ka jingthylli ki jaka shim pisa kiba don palat 12 tylli hynrei la plie tang ar tylli ban ai tiket ia kiba shong bos MTC kiba leit buh briew sha Tura bad ai tiket ia ka bos Arunachal Pradesh.
Kaba pynduhnong ka dei ia kiba khrong bai ieng kali namar kim shym la lah shuh ban kyrshan ialade namar bym don bos shuh kiba wan sha ISBT.
Kumban shu pynkynmaw kane ka ISBT la plie da u Amit Shah uba dei u Myntri ka sorkar india uba peit ia ka tnad kam pohiing ha ka 24 tarik Naitung 2021 ha ka jingiadonlang u Conrad K Sangma u myntri rangbah ka jylla, u G Kishan Reddy u myntri ka sorkar india uba peit ia ka tnad DoNOR, Bah Prestone Tynsong symbud myntri rangbah ka jylla, bah sniawbhalang dhar uba dei u myntri ka tnad transport ka sorkar jylla.
Ka jingmaramot ia ka jingkieng ha umiam ka la sdang naduh u bnai Nohprah 2023 hynrei haduh mynta u bnai Jymmang 2024 la sngewthuh ba kan dang slem namar ki hap ban khlong ia ka surok rong bad thep bujli da ka dewbilat ba kan skhem hynrei ka jingdheng kali kiba kiew bad ba hiar na shillong ka la long jubor man ka sngi.