Shillong, 31,Risaw- Ki pulit ka East Khasi Hills District ki la kem ia u bah Bless Dkhar u ba dei u nongialam jong ka seng HNYF East Khasi Hills halor ka jingkynnoh ba u donkti ban lum pisa beaiñ na ki trok kit mar ba kit palat put ia ki mar na jingkieng Damsite ha ki la dawa haduh 1500 tyngka tang kawei ka trok kit mar. Katkum ki khubor na ki bor pulit la ïathuh ba ia u Bah Bless Dkhar la ïoh kem noh hynnin ka sngi nyngkong da ki Pulit ka Laitumkhrah Police Station na ka thain Pohkseh.Ki Pulit ka Laitumkhrah Police Station kila register da ka Suo-Moto case pyrshah ia u Bless Dkhar halor ka khubor bad ki video bala saphriang ha ki Social Media, kiba pynshisha ia ka jinglum pisa une u Nongialam Sengbhalang na ki trok kit mar, ba un iarap pyllait ba kin iaid na ka Jingkieng Damsite.Ha kine ki khubor bad video ki ba la saphriang, la iohsngew ruh ia ka jingiakren hapdeng u bah Bless Dkhar bad uwei u briew ba kam ialade kum u nongkhaii, ba iapynbeit halor ka jingpyniaid ia ki trok kit mar na Jingkieng Damsite, Bad ha ka jingïakren u Bah Bless Dkhar u la kren da kaba shai ba u la pan 1500 kawei ka trok kit khaw FCI ne kiwei kiwei ki mar ruh.Ka Iingkashari Meghalaya High Court kala bthah ia ka Sorkar Jylla ba ka dei ban pyrkhing ia ka jingiaid jong ki trok kit mar na jingkieng Damsite namar ba ka jingkieng kala rim bad kam lah kyrda shuh ia ka jingkit kaba khia.Ka Iingkashari ka la pynmih ka hukum ba tang ki kali kiba khia hapoh ka 10 ton ki lah ban iaid na kane ka jingkieng.