Shillong 11 Nohprah: U bah Ronnie V Lyngdoh u ba dei u MLA/MDC ka Mylliem konstitwensi ha kajuh kapor u nongialam ha ka liang pyrshah ha iing dorbar thawaiñ ha jylla, ula ong, ba ka jingshah pynbor ia ki, ban wengnoh na ka jing iatreilang bad ka executive Committee ba la ialam da ka National People Party (NPP) ha District Council kamdei ka jingpynbiej ilekshon hynrei kadei ha ka nongrim.
U bah Ronnie ula ong, ba Ngi dei ki briew jong ka party ngi kohnguh beit kat kaba ka party ka pyniaid bad bthah ia ngi. Ia kane ubah Ronnie ula pynpaw ha ba iakren bad lad pathai khubor mynta ka sngi balang ka 11 tarik Nohprah 2024, hadien ba la mih ka khubor shah pynbor na ki nongialam ka seng Congress ia u bah Ronnie bad bah Pynahngaiñ ban wengnoh na ka jingiadei bad ka EC ha District Council ba la ialam da ka NPP.
“Haba ngi wengnoh na ka jingiatreilang hapoh ka executive Committee ha District Council kamdei ba ngin pynbiej ilekshon ba lajan MDC, hynrei ka jingiatreilang ka party Congress ha kato kapor bad ka party NPP, kadei namar, ba kadon ka jingiakynad ka bajur bha hapdeng ka party NPP bad ka party UDP, ba ngi sa iatreilang noh bad ka NPP ha District Council “, ong u bah Ronnie.
Ula ong, ba kum ka party ngi kyrshan ia ka executive committee ba la ialam da ka NPP ha District Council kalong, ba ngi sheptieng, ba lada kan khyllem ka District Council u lat ka Jylla (Governor) un sa ai noh da ka Administrative rule. Kumta ym ba ngi pyrkhat ia kano kano kadaw, hynrei ngi pyrkhat ban don ka Amendment ia ka Six Schedule lane kata ka Khyrnit ka ba phra, da ka ba ula ong, ba lada ym don mangi ban ia ai jingmut ia ka Amendment, te lada kin ai tang ki ophisar kilah ban ai ia ka Amendment ka ban pyntlot, pynduhbor ia ka District Council kaban ktah ia ka jaitbynriew.
Ka District Council kadei ka ba pynsah ia ka Riti Dustur, ka khyndew ka shyiap, ka synshar khadar naduh longshwa manshwa, ki dorbar Hima Dorbad Raid Dorbar Shnong bad kidon ki ain ban tehlakam ia ka jingwan ki bar jylla bad lada jia ba wengnoh ka kita kan buh jingma ia ka jaitbynriew bad ngi shim ia karai halor kata ka bynta ba ngi sa rung ban kyrshan ia ka NPP ha Council ym na kano kano kadaw, la ong ubah Ronnie.
Kumta ubah Ronnie ula ong, ba kum ka party ka ba iaid ryngkat ka Riti Synshar (constitution) jong ka party, ka discipline jong ka party, ngi hap kohnguh katba ka bthah.