Shillong, Jymmang 14:
U wei u rangbah na ka shnong Mylliem Umlympung uba la tip kyrteng kum u Bah Loukas Laitiam uba don 81 snem rta watla ha ka jingnoh ka rta hynrei man ka sngi u ju shong ban ai wai ia ki siej ha ka jaka ba ki nongjngohkai ki ju leit kai ha Bulls trek Wahniangleng.
Ka jingiakynduh u nonglum khubor ia u bah Loukas ka dei ha lynti haba u shong hajan jaka ieng kali ha ka por ba u nonglum khubor u hiar sha Wahniangleng mynshem taiew.
U Bah Loukas u la ong ba namar ka jaka ka long pynnoh bad kiew lada wan bad leit ha Wahniangleng, kumta u la don ia ka jingmut ban ai wai ia ki siej namar ba ki nongleit kai ki hap ban kyrshan kum u diengduh ban kham pynduna ia ka jingthait.
U la iathuh ba u ju aiwai 10 tyngka uwei u siej bad ki don la ki sngi ba u lah ban ai wai bha bad don ki sngi ba u lah tang khyndiat.
U la iathuh ruh ba mynshwa, ha ka sngi saitjain ki ju bun ki nongwan jngohkai hynrei mynta kim da bun shuh namar kiba ai wai siej ruh ki la sdang bun.
U bah Loukas u la ong ruh ba u shim ia kane ka kam ban kamai namar ba um lah shuh ban leit bylla kumta tang ban lait ban pan na iing u la shim noh ia kane ka kam tangban ioh bai bam, bai biri sikret ialade.
U la iathuh ruh ba mynshwa u dei tang ma u ba sdang ban aiwai ia kine ki siej kumta u lah bha ban aiwai, hynrei mynta ki la bun ba ai wai u la kham duna ban kamai pisa.
Haba kylli u sngew kumno lada ka sorkar ka shna surok noh ban pynpoi sha Wahniangleng une u rangbah u la ong ba lada ka surok ka poi shaduh sha Wahniangleng ruh ka biang lada ka long beit kumne kumba long mynta ruh ka biang.
Ka Wahniangleng ka dei kawei ka jaka jngohkai pyrthei kaba hap ha shnong Khadarmer, Mylliem Constituency namar ki nongjngohkai pyrthei haba ki poi sha kane ka jaka ki ong, “mini Switzerland” namar harud jong ka wah don ki ksehbilat kiba jrong bad ka madan kaba don ia ki phlang kiba jyrngam. Kane ka jaka jngohkai pyrthei ka la sdang ban paw pyrthei hadien ba la kut ka khlam covid-19.
