Shillong:
Katkum ka video ba la pyllait paidbah da ki lehnoh Balochistan Liberation Army (BLA), la iathuh ba 14ngut ki shipai Pakistan Army ki la iap ha ka District Kachhi jong ka Balochistan haba ka kali jong ki ka la shah pynbthei ha u bom ba la shna kyrpang (IED). Ki lehnoh Balochistan Liberation Army (BLA) ki la shim ia ka jingkitkhlieh halor katei ka jingjia, ong ka kyrwoh na ka sorkar.
“Ki lehnoh kiba dei na ka Balochistan Liberation Army ki la thom ia kawei ka kali jong ki bor pahara da ka tiar pynbthei kaba la shna kyrpang ha ka jaka ba la buh kyrpang ha Mach, Kachhi district”, la ong ka tnad pathai khubor PTI na ka kyrwoh jong ki shipai Pakistan.
Hadien kane ka jingjia, ki shipai Pakistan ki la iathuh ba ki dang pynlong ia ka jingkhleh khuid ha katei ka jaka ban pynduh ia kino kino ki lehnoh kiba dang sah.
Kane ka jingshah thombor ka long tang katto katne sngi hadien ba ki bor pahara jong ka Pakistan ki la pyniap ïa 10 ngut ki lehnoh ha Balochistan ha ki ar tylli ki jingjia bapher bapher ha ki distrik Kech bad Ziarat. Ki bor synshar ki la ong ba kine ki jingshah pyniap ki dei shi bynta jong ka jingpynshitom kaba kham heh ia ki kynhun lehnoh ha katei ka jylla.
Ka BLA ka la leh bun tylli ki kam thombor kiba kum kine ha ki por ba la dep. Ha u bnai Lber, katei ka kynhun, ka la rahbor ia ka Jaffar Express, kaba dei ka rel kit briew, kaba iaid na Quetta sha Peshawar, ha kaba ki don 440ngut ki briew. Katei ka jingjia ka la pynlong ia 21ngut ki riew paidbah bad saw ngut ki shipai. Ka Balochistan ka la mad ia ka jingkulmar kaba bteng la jan 20 snem kynthih. Ki kynhun jaitbynriew Baloch ki kynnoh ba ka sorkar pdeng jong ka Pakistan ka pyndonkam bakla ïa ki marpoh khyndew jong ka jylla khlem da siew bai lutksan ne pynroi ïa ka thaiñ kaba hok.
Kane ka jinghiar thma jong ka BLA ka long hadien shisngi ba ka India ka la pynlong ïa ki jinghiar thma ïa ki jingtei jong ki lehnoh ha ki jaka ba la bat da ka Pakistan. Ki tyllong khubor jong ka tnad iada ri jong ka ri India ki la iathuh ba katei ka jingkhynra ka dei kaba la thmu ia ki jaka sah ba la pyndonkam da ki kynhun lehnoh ban pynlong ia ki jinghiar thma shabar pud. Ia ki jingshah thombor la pynlong da kaba thikna bad la thmu ban khanglad ia ki jingpyrshang ban rung tuh ha ki por ban wan.
Hadien kane ka jingleh jong ka India, ka jinglong jingman ha shilynter ka Line of Control bad hapoh jong ka Pakistan ka dang sahkut. Ka jingshah thombor jong ki shipai pynlait im jong ka Balochistan (BLA).
