Shillong, Naiwieng 13: Ka CEC jong ka United Democratic Party (UDP) mynta ka sngi nongkong kala shong jingialang halor ban pynkhreh ban sei ïa u kyrtong ban ai reng ha ka Election MP jong u snem 2024.
Ka CEC jong ka UDP kala shim bun ki rai haba ia dei bad kane mad, hadien ba la wai ka jingialang u President ka UDP u Bah Metbah Lyngdoh Ula pynpaw ïa ka jingsngew skhem ba u kyrtong ba ka party ha ryngkat ka jingïatreilang bad ka HSPDP un ïoh jingjop ha ka elekshon MP kaban long ha u snem ban wan.
Haba jubab ia ka jingkylli halor ka jingmih ka VPP bad kaba la sei ruh ia u kyrtong MP, u Bah Metbah u la ong ba kum ka party kam kwah ban kynthoh ïa kiwei ki party hynrei u ong ba tang kawei kaba kum ka party ki la sngewthuh shai ka long ba ki paidbah ki la rai ban ai jingjop ïa u kyrtong ba ka UDP hapoh ka shatri jong ka Regional Democratic Alliance RDA.
Shuh shuh u bynrap da kaba ong ba ka UDP ka dei ka party kaba la rim bad ki paidbah ruh ki la rai ban kyrshan beit noh ia u kyrtong ka party khamtam lei ba ki la sakhi ïa kaei kaba la jia hadien ka elekshon MLA na kata ka daw ki paidbah ki la rai ban don beit noh ha ka liang ka UDP.