Shillong, Naiwieng
Ka Executive Committee jong ka Khasi Hills Autonomous District Council (KHADC) ka la rai ban pynbeit biang ia ka jingdon briew ha ki 29 tylli ki constituency namar ki don ki constituency kiba la bun briew palat bad don ki constituency kiba khyndiat palat khnang ban long iaryngkat haba sam ki kam pynroi.
Ha ka ilekshon MDC kaba la long ha u snem 2019 ka Mawlai constituency ka la don palat 45 hajar ngut ki nongthep vote katba ha Laban Mawprem constituency ka la duna bha ka jingdon briew namar ka la poi tang 12 hajar ngut ki nongthep vote.
Kumta ban pynïaid sted ia kane ka jingpynbeit thymmai ia ki constituency khnang ban ioh pyntreikam noh ha ka ilekshon MDC ka ban long ha u snem 2024, ka Executive Committee ka la thaw da ka Delimitation Committee ia kaba la khlieh da u nongbishar ba la shongthait jong ka District Council Court u Dr. S.Kharsymlieh, u bah M Kharkrang uba dei u secretary barim ka KHADC kum u Secretary ka Committee bad ki dkhot ki long Dr. SL Marbaniang, MLA barim, kong R Myrboh, nonghikai skul ba la shongthait bad Dr. DRL Nonglait uba dei u Prof. khasi ha NEHU.
Namar bym lah shuh ban phah jingtip sha man ki nongkitkam shnong, ki khlieh nongsynshar bad ki riew rangbah ha baroh ki constituency, ki dkhot jong kane ka committee hapoh ka jingialam u Dr. S. Kharsyiemlieh ki la wan ïakynduh kyrpang ia ki lad pathai khubor ha Shillong Press Club ban ai jingpynbna ia ka tarik, ka por bad ki jaka khnang ba ki lah ban wan ai jingmut haba ki leit sha man ki district.
Kane ka committee kan sdasng naduh ka 21 tarik mynta ubnai ban leit sha Mawkyrwat, South West Khasi Hills ban sngap na ka jignai jingmut jong ki paidbah, ha ka 24 tarik pat ha Mairang, Eastern West Khasi Hills, 28 tarik mynta u bnai kan long ha ophis ka KHADC ha Shillong, East Khasi hills na bynta ki 6 tylli ki constituency, 1 tarik Nohprah ha Sohra, 6 tarik Nohprah ha Nongpoh, 12 tarik Nohprah ha Shillong na bynta 9 tylli tylli ki constituency bad 15 tarik Nohprah ha Nongstoin ka por kan sdang beit 11 baje mynstep.