Ka kam sorkar phi shah hukum, ka kam lajong phi long kynrad, ong ka longkmie ba ri masi
Shillong, Jylliew 27:
Kham niar ban lap ne ban shem ha ri Khasi ba ka longkmie kan shim ia ka sienjam ban ri masi khemdud ban pyndap ia ka iing ka sem watla hapdeng ka jingbunkam ban sumar ia ki lai ngut ki khun kiba dangrit.
Kane ka longkmie khasi ka dei kaba la tip kyrteng ka kong Balarishisha Nongrum kaba dang 34 snem ka rta kaba shong ba sah ha Lumsohpetbneng, Ribhoi District.
Kane ka longkmie ka la sdang ban ri masi khemdud mynta ka la iaid palat san snem hadien ba ka khun ba nyngkong ka la kham heh.
Kaba sngewsih pat ka la wan jia ia kane ka longkmie haba ka ri haduh khyndai tylli ki masi khemdud hynrei saw tylli ki la iap noh namar ka jingwan ka khlam mynshem snem kiba shongdor palat shi lak laiphew hajar uwei katba kiwei kiba dang sah ka la die noh bad buh mynta satang ar tylli.
Ka kam ri masi ka dei shisha kaba khia namar hap ban pynbiang ka por ban aibam bad ban pynbiang ruh ka por ban khem dud hynrei ka kong Balarishisha ka la skhem jingmut ban pynkhreh skul ia ki khun dangstep bad pynbiang bam pat ia ki masi por mynsngi.
Ban tip kham bniah ia ka jingiaid lynti ka kong Balarishisha, U Nongsain Hima u la leit ban iakynduh kyrpang ha iingsah jong ka ha Lumsohpetbneng.
Ha kane ka jingiakynduh ka kong Balarishisha ka la pynpaw ba ka la jied ia kane ka kam ri masi khemdud ka dei namar ka sngewthuh ban leit rep ka shem shitom namar lada dei por slap hap shah wat lada dait pyrjong hynrei ka kam ri masi watla ka teh ia ka por hynrei ka kham suk namar ka la ioh lad ban peit lang ia ki khun.
Ka la iathuh ba kam pat ju leit wad kam sorkar namar ka sngewthuh ba kam don kyrdan kaba heh kumba long lem kiwei hynrei ka la shim ia ka rai ban trei ia ka kam lajong ban long kynrad namar ka la iohi b aka kam sorkar ban shah hukum ha kiwei pat.
Shuh shuh ka la iathuh ba kam pat ju lap ba ki kynthei kin ri masi namar ka bankhia ia ka bormet bad ka tehpalat ia ka por namar lada jia ki jingsngewsih ha iing kin nym lah ban pep namar ki hap ban pynbiang bam ia ki masi.
“Don ka por ba ka sma haba ri masi hajan iing hynrei kamleilei haba sma pisa” ka la ong ryngkat ka dur bap huh samrkhie.
Kumta ka kong Balarishisha ka la kyntu ia ki samla wat ong ba ka jylla ka kyrduhkam namar ka kam ka pahuh lada ki trei shitom bad lada don kiba kwah ban tip ia ka rukom ri masi ki lah ban wan khnang ba kan batai.